'შეარჩიეთ ჩემი დონის ოპონენტი და მოვალ’– ადიგენის გამგებელი

„სამხრეთის კარიბჭეს“ გადაცემის „კვირის აქცენტის“ თემა მიმდინარე კვირაში ადიგენის მუნიციპალიტეტში სოფლებში გაცემული კომპენსაციებია.
ადიგენის 8 სოფელს ცენტრალურმა ბიუჯეტმა, 2014 წლის 14 სექტემბრის სტიქიის შედეგად, სოფლის მეურნეობის კუთხით მიყენებული ზარალის საკომპენსაციოდ 321.000 ლარი გამოუყო. ამ თანხით ადიგენის გამგეობამ საკვები პროდუქტები შეიძინა და 13 მარტს მათი განაწილება დაიწყო.

14 მარტს, „სამხრეთის კარიბჭეში“ სოფელ იჯარეთის მცხოვრებლები ჩამოვიდნენ. ისინი აცხადებენ, რომ ადგილობრივებს პროდუქტები სხვადასხვა რაოდენობით შეხვდათ, რასაც მათი ნაწილის უკმაყოფილება მოჰყვა.

18 მარტს კომპენსაციების თემაზე საპარლამენტო უმცირესობის წევრმა, ადიგენის მაჟორიტარმა დეპუტატმა ზურაბ ჩილინგარაშვილმა პარლამენტში, 5–წუთიან გამოსვლაში ისაუბრა. ჩილინგარაშვილმა განაცხადა, რომ კომპენსაციის გაცემის სქემაში კორუფციის ნიშნებს ხედავს.

იმავე დღეს, 18 მარტს, იჯარეთში ადგილობრივებთან გამგეობის წარმომადგენლები მივიდნენ. შეხვედრა დაპირისპირებაში გადაიზარდა. იჯარეთის მცხოვრებთა ნაწილი გამგეობას პროდუქტების შერჩევით გადანაწილებაში ადანაშაულებს.

განვითარებული მოვლენებიდან გამომდინარე, თემა „სამრეთის კარიბჭემ“ გადაცემისთვის შეარჩია და გუშინ, 18 მარტს, გადაცემაში სტუმრობისთვის ადიგენის მუნიციპალიტეტის გამგებელს ზაქარია ენდელაძეს დაუკავშირდა. გამგებელმა გადაცემაში სტუმრობაზე თანხმობა განაცხადა. მასთან ერთად გადაცემის სტუმარი უნდა ყოფილიყო, იჯარეთის ერთ–ერთი მცხოვრები, ვისაც პროდუქტების გადანაწილებაზე პრეტენზია აქვს.

დღეს, 19 მარტს, დილით, გამგეობიდან საზოგადოებასთან ურთიერთობის სამსახურის წარმომადგენელი მამუკა კალანდაძე დაგვიკავშირდა და გვითხრა, რომ გამგებელი დაკავებულია და გადაცემაში მოსვლას ვერ შეძლებს. ამიტომ, მან გვთხოვა გადაცემა ხვალ ჩაგვეწერა, ოღონდ იმ პირობით, თუ გადაცემას „სამხრეთის კარიბჭესთან“ ერთად თავადაც ჩაწერდა. გადაცემაში გამგებლის მოსვლის მთავარი პირობა კი ის იყო, რომ „სამხრეთის კარიბჭეს“ გამგებლის ოპონენტად მისი დონის პიროვნება უნდა შეერჩია.

მოგვიანებით აღნიშნული სატელეფონო საუბარში თავად ზაქარია ენდელაძემაც დაგვიდასტურა.

„მოვალ გადაცემაში, ოღონდ ჩავიწერთ ჩვენც, ჩვენი სამსახური ჩაიწერს და შეარჩიეთ ჩემი დონის ოპონენტი“, – რამდენჯერმე ხაზგასმით გაიმეორა გამგებელმა.

გთავაზობთ სატელეფონო საუბრის ჩანაწერს.



„კვირის აქენტი“ კი „სამხრეთის კარიბჭეში“ ამ წუთებში, გამგებლის გარეშე იწერება. გადაცემაში იჯარეთის მცხოვრებლები თავიანთ პრეტენზიებზე საუბრობენ.

მისი ნახვა ხვალ, 20 მარტს, 20:00 საათზე, „სამხრეთის კარიბჭეს“ ვებგვერდზე შეგეძლებათ.

[ნინო ნარიმანიშვილი, ახალციხე]