ღვარცოფი ადიგენში – 200–მდე ადამიანი მთაში ჩარჩა

სოფელ დერცელსა და ამავე სოფლის მთაში ძლიერი, რომელიც დასახლებული პუნქტიდან ექვსი კილომეტრის მოშორებით მდებარებს, ძლიერი წვიმა გუშინ, 27 ივლისს, ერთ საათს გაგრძელდა. მთაში იყო სეტყვაც.

„სათიბად ვიყავი. ძლიერი ღვარცოფი მოვარდა და გზა მოწყვიტა“, – გვიყვება მომხდარის თვითმხილველი, დერცელში მცხოვრები შუქრი მიქელაძე.

მისივე თქმით, შემთხვევის შედეგად არავინ დაშავებულა, ღვარცოფმა რამდენიმე სული პირუტყვი წამოიღო, თუმცა მას შემდეგ რაც ნიაღვარმა საქონელი გაშლილ ადგილზე გაიტანა, მათ გადარჩენა შეძლეს.

როგორც ადგილობრივები გვიხსნიან, სტიქიის შედეგად 20 მეტრი სიგრძის გზა დაახლოებით 2 მეტრის სიღრმეზე მოწყდა. დაზიანდა სასმელი წყლის მილებიც.

„ამ დრომდე მოსახლეობას წყალი არ მიეწოდება, სოფლიდან მივდივარეთ დიდი მანქანით, რომ დროებით რეზინის მილებით გადავაბათ“, – აცხადებს შუქრი მიქელაძე.

სწორედ მან დარეკა პირველმა დერცელში გამგებლის წარმომადგენელთან: „შემდეგ დავუკავშირდით გამგებელსაც. გვითხრა ფული შეკრიბეთ და თვითონ გააკეთეთ გზაო, ამიტომ ჟურნალისტებს დავუკავშირდით. ამის მერე, როგორც იქნა, ამოვიდნენ სოფელში, თუმცა, ის ადგილიც კი არ უნახავთ, სადაც გზა დაზიანდა, ჩვენ ადგილობრივებს კი გამგებელმა პროვოკატორი გვიწოდა“.

ადიგენის მუნიციპალიტეტის გამგებელს ზაქარია ენდელაძეს „სამხრეთის კარიბჭე“ ვერ დაუკავშირდა, მისი მობილური ტელეფონი გამორთულია. რედაქციამ დაკავშირება სცადა გამგებლის მოადგილეებთანაც და პრესსამსახურთანაც. ყველა მობილური გამორთული აღმოჩნდა.

არაერთგზის მცდელობის შემდეგ, სატელეფონო კავშირი შედგა გამგებლის წარმომადგენელთან ნოდარ გორგოძესთან. გორგოძემ მომხდარი დაადასტურა და განაცხადა, რომ გზის გაწმენდვას მალე დაიწყებენ. ამის შემდეგ კი კავშირი, რომელიც ხარვეზებით მიმდინარეობდა, შეწყდა.
ტექნიკური ხარვეზების ფონზე მოხერხდა დაკავშირება ადიგენის მუნიციპალიტეტის საკრებულოს თავმჯდომარე იმედა მღებერიშვილთანაც.
„მთელი მუნიციპალიტეტის ხელმძღვანელობა იქ ვიყავით, ჩამოწოლილი არაფერი არ არის. გზის პატარა მონაკვეთია დაზიანებული უბრალოდ. წყალიც ჩვეულებრივად მიეწოდება ხალხს, მომხდარს კომისია სწავლობს“, – გვითხრა საკრებულოს თავმჯდომარემ.

იმის გარკვევა, აპირებს თუ არა ადგილობრივი თვითმმართველობა დაზიანებული გზის გაკეთებას, მღებრიშვილთან ვერ მოვასწარით, მისი ტელეფონიც გაითიშა.

„ვიდრე კომისია იმსჯელებს და გადაწყვეტილებას გამოიტანს, ბავშვებსა და ქალებს უწყლოდ ხომ არ დავტოვებთ?! ამიტომ საკუთარი ძალებით იქნებ მილები გადავაბათ და ამ ორმოს დროებით გადავატაროთ. სამომავლოდ თუ კაპიტალურად არ გაკეთდა, იქ მოსახლეობას წყალი არ ექნება“, – გვითხრეს ადგილობრივებმა, რომლებმაც განაცხადეს, რომ ამ დროისთვის სატვირთო მანქანით მთისკენ მიემართებიან.

ნოდარ გოროგოძის ინფორმაციით, შემთხვევის ადგილზე იმყოფებიან სამართალდამცველებიც.

[თამუნა უჩიძე, თინათინ ზაზაძე, ადიგენი]