მამუკა ნასიძე: 'ახალციხის გამგებელმა ტრაქტორი მოიპარა' [Video]

შპს „ლაბა +“-ის დირექტორის მამუკა ნასიძის განცხადებით, სამცხე-ჯავახეთის სამხარეო ადმინისტრაციის ბალანსზე რიცხული ტრაქტორი, რომელიც მას სოფლიდან მთაში მისასვლელი გზის შესაკეთებლად ათხოვეს, დღეს გუბერნიისთვის უნდა დაებრუნებინა, თუმცა ვერ შეძლო, რადგან ტრაქტორი ადგილზე აღარ დახვდა.

„ტრაქტორი ახალციხის გამგებელმა მოიპარა და წაიყვანა მთაში „ხალტურაზე“. ვკითხე, რა უფლებით მოიპარე ტრაქტორი-მეთქი და მიპასუხა, არ მაინტერესებს სოფლის მეურნეობაო“, - აცხადებს ნასიძე.

მისი თქმით, ტრაქტორი სამხარეო ადმინისტრაციამ დაახლოებით 2 თვის წინ, მთამდე მისასვლელი გზის შესაკეთებლად ათხოვა: „22 კილომეტრი შევაკეთეთ, 3500 ლარი დაუჯდა ეს შპს „ლაბა +“ს, დაგვეხმარა მოსახლეობაც. იქ, სადამდე მისასვლელი გზაც გაკეთდა, ასი ათასობით ტუკი თივა იპრესება. ტრაქტორი, რითაც გზა შევაკეთეთ, 600 ათასი ლარი ღირს, ის მე მაწერია, მაგრამ დღეს გამგებელმა მოიპარა და მთაში წაიყვანა“.

სამცხე-ჯავახეთში პრეზიდენტის რწმუნებულის მოადგილე გელა დემეტრაძე აცხადებს, რომ ახალციხის მუნიციპალიტეტის საკრებულოს მიმართვის საფუძველზე ტრაქტორი სოფელში ნამდვილად გაიგზავნა და ამის შესახებ საკრებულოსთან შესაბამისი ხელშეკრულებაც გააფორმა: „გუბერნიის ბალანსზე გვყავს ტექნიკის გარკვეული რაოდენობა და საგანგებო მდგომარეობისთვის გამოიყენება ხშირად. საკრებულომ მოგვმართა თხოვნით, რომ ტრაქტორი გამოგვეყო სოფლისთვის და დავაკმაყოფილეთ მათი მოთხოვნა. სოფელს ეს ტრაქტორი ალბათ გზის შესაკეთებლად ან სანიაღვრე არხების მოსაწესრიგებლად უნდოდა. ჩვენთვის დღეს უნდა დაებრუნებინა“.

ახალციხის მუნიციპალიტეტის საკრებულოს გამგებელი ბესიკ ბლიაძე ნასიძის განცხადებით გაოგნებულია. მისი თქმით, მამუკა ნასიძე არ არის ვალდებული იყოს გარკვეული თუ სად წავა გუბერნიის ბალანსზე რიცხული ტრაქტორი. ტრაქტორის წაყვანასა და მოყვანაზე პასუხისმგებლობა ურავლის თემის რწმუნებულს ბადრი ზაზაძეს ევალებოდა: „სასაცილოა, როცა ის ამბობს, რომ ტრაქტორი გამგებელმა მოიპარა“.

გამგებლის განმარტებით, ტრაქტორი, რომელიც დღეს სპეციალური მისაბმელით ახალციხეში უნდა ჩამოეტანათ, ამავე სოფლის მოსახლეობის თხოვნით მთაში გაგზავნეს, რადგან იქ ხევში სატვირთო მანქანა გადაბრუნდა და მის ამოსაყვანად დასჭირდათ: „ღვთის წყალობით, ვინც მანქანაზე იყო, უვნებელი გადარჩა, მანქანის ამოყვანას ტრაქტორი ამ წუთებშიც ცდილობს“.



[თამუნა უჩიძე, ოთარ აწყურელი, ახალციხე]