ზურაბ ჩილინგარაშვილი სამართალდამცავებს მიმართავს დაინტერესდნენ ადიგენში კომპენსაციის გაცემის საკითხით

ადიგენის სტიქიით დაზარალებული სოფლების შესახებ ადიგენის მაჟორიტარმა დეპუტატმა პარლამენტის დღევანდელ სხდომაზე ისაუბრა. 5–წუთიან გამოსვლაში ჩილინგარაშვილმა რამდენიმე კითხვაზე მოითხოვა პასუხი: ვინ გადაწყვიტა, ხალხის დაუკითხავად, სტიქიით დაზარალებულებისთვის პროდუქტებით მიეცათ კომპენსაცია; რატომ განკარგავენ ზამთრისთვის გამოყოფილ ფულს გაზაფხულზე და რატომ შეარჩიეს პროდუქტების მიმწოდებელი ფირმა პირდაპირი მოლაპარაკების წესით.

„მოგახსენეთ რამდენიმე კვირის წინ, რომ 2014 წლის 14 სექტემბერს ადიგენის რაიონში მოხდა დიდი სეტყვა, როდესაც განადგურდა 8 სოფლის მოსავალი. ბევრი ჯახის შემდეგ, როგორც იქნა გამოიყო თანხა, 321.000 ლარი, მაგრამ ვიღაცამ, ამ ხალხის დაუკითხავად, გადაწყვიტა, რომ მიეტანა მაკარონი, კარტოფილი, ზეთი. ძალიან მაინტერესებს, ვისი გადწყვეტილება იყო ეს“, – განაცხადა ჩილინგარაშვილმა.

მისივე თქმით, კითხვებს იწვევს თანხის გაზაფხულზე განკარგვაც: „მე ვიცი სეკვესტრი ბიუჯეტში, იმიტომ რომ შევარდნაძის პერიოდში მიცხოვრია. უკვე თქვენს პერიოდშიც ვხვდები, რომ იქნება ბიუჯეტის სეკვესტრი. მაგრამ გაზაფხულის სეკვესტრი?! ერთი თვე ჩამოვაჭრათ და ზამთარს მივაკეროთ?! არ გამოვა!“

ჩილინგარაშვილმა სხდომაზე განაცხადა, რომ ის ფირმა, რომელიც პროდუქტების დასარიგებლად შეარჩიეს, საკრებულოს ერთ–ერთი წევრის ყოფილი ფირმაა: „რომელიც ახლა ან ცოლზე ექნება გადაფორმებული, ან ძმაზე, ან სიდედრზე, ან ვიღაცაზე. და ასევე, მოსახლეობა მეუბნება, რომ 1 ლიტრი ზეთი უფრო ძვირი უზით, ვიდრე საცალო ბაზრობაზე იყიდება. მე მცემს კორუფციის სუნი. მივმართავ სამართალდამცავ ორგანოებს, მიიღონ მხედველობაში და მიაწოდონ ზუსტი ინფორმაცია ამ ხალხს“.

შეგახსენებთ, 2014 წლის 14 სექტემბრის სტიქიით დაზარალებულთა საკომპენსაციოდ ცენტრალური ბიუჯეტიდან 321.000 ლარი გამოიყო. დაზარალებულებს საკვებ პროდუქტებს ურიგებენ. ადგილობრივები ირწმუნებიან, რომ პროდუქტი არათანაბრად განაწილდა, ადიგენის ხელისუფლებაში კი მათ პროტესტს არ იზიარებენ და ამბობენ, რომ არსებულ ვითარებაში აღარაფერი შეიცვლება.

[ნინო ნარიმანიშვილი, ადიგენი]