ადიგენში მცხოვრები – „ბენზინს გადავისხამ და თავს დავიწვავ“

ადიგენის მუნიციპალიტეტის სოფელ იჯარეთში მცხოვრები შოთა საგინაძე დღეს, 8 მაისს, სამცხე–ჯავახეთის გუბერნატორს აკაკი მაჭუტაძეს შეხვდა. საგინაძეს 2014 წლის სექტემბერში სტიქიით მიყენებული ზიანისთვის კომპენსაციის სახით, მხოლოდ ერთი ტომარა ფქვილი შეხვდა, რეალურად კი ძლიერმა სეტყვამ მოსავალი მთლიანად გაუნადგურა და ამიტომ მეტ კომპენსაციას იმსახურებდა.

„გუბერნატორს ვთხოვე რომ დაგვხმარებოდა. მითხრა აქამდე სად იყავიო, ავუხსენი, რომ ამის შესახებ გამგეობა საქმის კურსში იყო. კონკრეტულად გამგებელმა კი ჩვენთან სასაუბროდ იმ გადაცემაში მოსვლა, რომელიც „სამხრეთის კარიბჭემ“ ჩაწერა, არ იკადრა. გუბერნატორმა მითხრა მე ვერაფერით დაგეხმარები და პროკურატურას მიმართეო“, – ამბობს შოთა საგინაძე.

ადიგენში კომპენსაციის განაწილების საკითხს სამართლებრივი მსვლელობა მიეცემა თუ არა ამის შესახებ მას შემდეგ გაირკვევა, რაც ადიგენის მუნიციპალიტეტის გამგეობა „ახალგაზრდა იურსიტთა ასოციაციას“ გამოთხოვილ დოკუმენტებს გადასცემს.

„ადიგენის გამგეობიდან შესაბამისი დოკუმენტები გამოვითხოვეთ. პასუხს რომ მივიღებთ, მას შემდეგ გვეცოდინება როგორ ვიმოქმედებთ“, – ამბობს საიას წარმომადგენელი ქეთევან ბებიაშვილი.

შოთა საგინაძე კი ირწმუნება, რომ გაჩერებას არ აპირებს, რადგან მომხდარით ძალიან შეურაცხყოფილია: „დაზარალებული რომ არ ვიყო და მოსავალი არ გაენადგურებინა სტიქიას, ხმას არ ამოვიღებდი. ძალიან დამცირებულად ვგრძნობ თავს. იმ დღეს, ფქვილი რომ არ გვქონდა, იმ მეზობელს ვესესხეთ, რომელსაც 18 ტომარა ერგო. ბოლო–ბოლო ბენზინს გადავისხამ და თავს დავიწვავ“.

შეგახსენებთ, რომ 2014 წლის სექტემბერში სტიქიით დაზარალებულებისთვის 321 000 ლარი გამოიყო. ამ თანხით ადგილობრივებისთვის პროდუქტები შეიძინეს. კომპენსაციისა სახით პროდუქტის დარიგებას ადიგენში ხმაური მოჰყვა. მოსახლეობის ნაწილი ირწმუნება, რომ კომპენსაცია რეალრუად მიყენებული ზიანის მიხედვით არ განაწილდა.

[თამუნა უჩიძე, ახალციხე]