იჯარეთში ადგილობრივები გამგეობის თანამშრომლებს დაუპირისპირდნენ

დაპირისპირება იჯარეთში, ადგილობრივები ესაუბრებიან გამგებლის მოადგილესა და რწმუნებულს

იჯარეთის მცხოვრებლები სოფელში იქამდე შეიკრიბნენ, ვიდრე მათთან ადიგენის მუნიციპალიტეტის გამგეობის წარმომადგენლები მივიდოდნენ.
ადგილობრივებთან ადიგენის მუნიციპალიტეტის გამგებლის მოადგილეები, მინდია ჯელია და არსენ ბალახაშვილი და სოფელში გამგებლის წარმომადგენელი გიორგი სოფრომაძე მივიდნენ. ადგილობრივი ხელისუფლების წარმომადგენლების გამოჩენისთანავე სოფელში ვითარება დაიძაბა.

იჯარეთის მცხოვრებლები ამბობენ, რომ გამგეობამ სოფელში კომპენსაცია უსამართლოდ გადაანაწილა. ზოგმა ძალიან ბევრი პროდუქტი მიიღო, ზოგმა ნაკლები, ზოგს კი საერთოდ არ შეხვდა. იჯარეთელები გამგეობის წარმომადგენლებს უხსნიან, რომ სოციალურად დაუცველები არიან, ჯანმრთელობის პრობლემები აქვთ და მეტი პროდუქტი უნდა მიეღოთ.

გამგეობის წარმომადგენლები კი ცდილობენ შეკრებილებს აუხსნან, რომ პროდუქტი არა სოციალური მდგომარეობის, არამედ, ზარალის ოდენობის მიხედვით გადანაწილდა.

„თუ ფიქრობთ, რომ რამე შერჩევით მოხდა, ძალიან ცდებით, ეს უმადურობაა“, – მიმართა შეკრებილებს მინდია ჯელიამ.

სოფელში გამგებლის წარმომადგენელმა გიორგი სოფრომაძემ, რომელიც ზარალის დამთვლელი კომისიის წევრი იყო, ადგილობრივებს განუმარტა, რომ კომპენსაციის საკითხი საქართველოს პრემიერ–მინისტრმა ირაკლი ღარიბაშვილმა გადაწყვიტა: „თუ რაიმე პრეტენზია გაქვთ, მას მიმართეთ, პრემიერმა დამიჭიროს“.

"სამხრეთის კარიბჭესთან" კომენტარში კი სოფრომაძემ განაცხადა, რომ არანაირ შერჩევით გადანაწილებას ადგილი არ აქვს. პროდუქტები ნაწილდება იმის მიხედვით, ვინ რა ოდენობის ზარალი მიიღო სტიქიის დროს.

ადგილობრივებს ხელისუფლებასთან კიდევ ერთი პრეტენზია აქვთ, ისინი აცხადებენ, რომ ჯობდა კომპენსაცია ფულადი ყოფილიყო: "ჩვენ რაც გვინდოდა, იმას ვიყიდიდით.

შეგახსენებთ, რომ იჯარეთი ერთ–ერთია გასული წლის 14 სექტემბერს ძლიერი სეტყვის შედეგად დაზარალებულ 8 სოფელს შორის. ამ სოფლებისთვის ზიანის ასანაზღაურებლად ცენტრალური ბიუჯეტიდან 321.000 ლარი გამოიყო. დაზარალებულებისთვის პროდუქტები შეიძინეს. ზეთის, ფქვილისა და მაკარონის დარიგება იჯარეთში 13 მარტს დაიწყეს. თუმცა, აღმოჩნდა, რომ დაზარალებულთა ნაწილი სიაში საერთოდ არ იყო, ნაწილის ზარალი კი კომისიას დათვლილი არასათანადოდ ჰქონდა. ამიტომ, პროდუქტის დარიგებას პროტესტი მოჰყვა. რიტუალების სახლში მიტანილი ფქვილი, შაქარი, ზეთი, ვერმიშელი და მაკარონი, ადიგენის მუნიციპალიტეტის გამგეობის წარმომადგენლებმა, ისევ, რიტუალების სახლში დატოვეს.

დღეს, 18 მარტს, ამ თემაზე 5–წუთიან გამოსვლაში ადიგენის მაჟორიტარმა, საპარლამენტო უმცირესობის წევრმა ზურაბ ჩილინგარაშვილმა ისაუბრა. მან სამართალდამცავ უწყებებს მიმართა დაინტერესდნენ ამ საკითხით, რადგან აშკარად ჩანს კორუფციის ნიშნები.

[თამუნა უჩიძე, ნინო ნარიმანიშვილი, ადიგენი]