იჯარეთში ხალხს კომპენსაცია არ მოსწონს, ხელისუფლებას კი ხალხის უმადურობა [Video]

მთავარი → ეკონომიკა 18.03.2015

'რომ დაწყნარდნენ, დამშვიდნენ ის აჯობებს და მადლობა მოიხადონ რაც მიუვიდათ იმაზე დღეში ათჯერ, ოცჯერ და ასჯერ. ღმერთმა მეორედ არ მოიყვანოს თორემ, იმაშიც დარწმუნებული ვარ, რომ ამნაირ სიკეთეს აღარასდროს გააკეთებს ალბათ ჩვენი ხელისუფლება', – სოფელ იჯარეთში გამგებლის წარმომადგენელს ხალხის პროტესტი უკვირს.

იჯარეთში ადგილობრივთა ნაწილის უკმაყოფილება სტიქიით დაზარალებული მოსახლეობისთვის გამოყოფილი პროდუქტის განაწილებამ გამოიწვია. სოფელში მცხოვრებლები დღეს, 18 მარტს, ადგილობრივი თვითმმართველობის წარმომადგენლებს დაუპირისპირდნენ. იჯარეთელები აცხადებენ, რომ სტიქიამ ყველა თანაბრად დააზარალა, თუმცა კომპენსაციით მიღებული პროდუქტი არათანაბრად განაწილდა.

ადიგენში 2014 წლის სექტემბერში სტიქიამ 8 სოფელი დააზარალა. კომპენსაციისთვის მთავრობის სარეზერვო ფონდიდან 321 000 ლარი გამოიყო და ამით ადგილობრივმა თვითმმართველობამ პროდუქტი შეიძინა. ადიგენის მუნიციპალიტეტის მაჟორიტარი დეპუტატი ზურაბ ჩილინგარაშვილი ზარალის ანაზღაურების ფორმაში კორუფციის სქემას ხედავს.

ადიგენის გამგეობაში კი ირწმუნებიან, რომ ყველაფერი კანონიერად გაკეთდა და სახელმწფო ხალხს მაქსიმალურა დაუდგა გვერდში.

შეგახსენებთ, ადიგენის 8 სოფელს სტიქიამ 2014 წლის 14 სექტემბერს შეუტია. სპეციალურმა კომისიამ ზარალი ორი მიმართულებით, სოფლის მეურნეობისა და ინფრასტრუქტურის კუთხით შეისწავლა. სოფლის მეურნეობის კუთხით მიყენებულმა ზარალმა 1.000.057 ლარი, ინფრასტრუქტურის მიმართულებით კი 35.740 ლარი შეადგინა.

ინფრასტრუქტურული ზარალის ასანაზღაურებლად ადიგენს 35.000 ლარი გადაეცა. ტენდერში შპს „ტყუპები 2013“–მა გაიმარჯვა და სამშენებლო მასალები მოსახლეობაზე აღნიშნულმა ფირმამ გასცა.
321.000 ლარი კი სასოფლო–სამეურნეო ზარალის ასანაზღაურებლად გამოიყო.

[თამუნა უჩიძე, ოთარ აწყურელი, ადიგენი]