ზურაბ ჩილინგარაშვილი: "იმიტომ ხომ არ ისჯება ადიგენი, რომ ის ვანო მერაბიშვილის რაიონია?!"

ადიგენის მუნიციპალიტეტის მაჟორიტარი დეპუტატის ზურაბ ჩილინგარაშვილის თქმით, მუნიციპალიტეტი უსამართლოდ ისჯება, რადგან „ნაციონალური მოძრაობის“ არაერთი მიმართვის მიუხედავად სამი წელია ადიგენში გაზიფიცირების პროცესი შეჩერებულია. მისი თქმით, ყველა პრემიერმინისტრი, რომელიც ამ სამი წლის განმავლობაში იყო პირობას დებდა, რომ ადიგენის გაზიფიცირება აგვისტოში დასრულდებოდა. თუმცა იმის მერე სამი აგვისტო გავიდა.

"სინამდვილეში ეს პროცესი 2013 წელს უნდა დამთავრებულიყო. შეჩერებულია აბასთუმნის მშენებლობაც, აქ არაა კანალიზაცია და წყალმომარაგება. ეს მაშინ, როცა ადგილობრივები მხოლოდ საკურორტო მომსახურებით ირჩენენ თავს. გაღმა ადიგენის წყლის რეაბილიტაციისთვის თანხა ჩარიცხული იყო, მაგრამ ეს სადღაც გაქრა და სამუშაოები შეჩერდა. ასევე შეჩერებულია გოდერძის და საირმისკენ მიმავალი გზების მშენებლობა, რის გამოც ადიგენი ისევ ჩიხად რჩება“, – განაცხადა ზურაბ ჩილინგარაშვილმა პარლამენტის სხდომაზე.

მისივე თქმით, მოსახლეობის ერთ–ერთი მთავარი პრობლემა უმუშევრობაა, რის გამოც ხე–ტყე იჩეხება: „ამას ემატება კანონი მაღალმთიანი რეგიონების შესახებ. ძველი კანონით რაიონი მაღალმთიან რეგიონს ეკუთვნოდა, ხოლო ახლით დაახლოებით 95% არ მიეკუთვნება, რის გამოც მოსახლეობას შეღავათები გაუუქმდა. სამაგიეროდ რაიონს უკვე ჰყავს ორი გამგებელი, ორი საკრებულოს თავმჯდომარე, სამი გამგებლის მოადგილე, ორი საფინანსოს უფროსი“, - აღნიშნა ჩილინგარაშვილმა.

მან ასევე ყურადღება გაამახვილა იმ ფაქტზე, რომ ადიგენის მუნიციპალიტეტის ყოფილი თანამშრომლები, რომლებიც სასამართლოებმა გაამართლეს ახლა ადგილობრივ თვითმმართველობას განაცდური საათების ანაზღაურებას სთხოვენ.

"რაში იხარჯება ეს ფული, რა ჰქვია ამას თუ არა დასჯა? იმიტომ ხომ არ ისჯება ადიგენი, რომ ის არის ვანო მერაბიშვილის რაიონი, ან იმიტომ, რომ დეპუტატი არის "ნაციონალური მოძრაობის" წარმომადგენელი. 2016 წლის არჩევნებში თქვენი გამარჯვების შანსი ნულია, ამას უკვე უნიათობა კი არა მავნებლობა ჰქვია. იმ ფონზე, რომ არ იქმნება სამუშაო ადგილები, ხალხი სიღარიბის ზღვარზეა, მოგიწოდებთ, რომ ადიგენი დატოვოთ მაღალმთიან რეგიონში და რაღაც შეღავათი მაინც მისცეთ ამ გაჭირვებულ ხალხს", – მოუწოდა ჩილინგარაშვილმა უმრავლესობას.

[თამარ თოთაძე, ადიგენი]