ადიგენში სტიქიით დაზარალებულ მოსახლეობას დაეხმარებიან

2014 წლის 14 სექტემბრის სტიქიის დროს ადიგენის მუნიციპალიტეტის 9 სოფელი დაზარალდა. ძლიერი წვიმა დაახლოებით ნახევარ საათს, სეტყვა კი 10 წუთის განმავლობაში გრძელდებოდა. სტიქიის შედეგად დაზიანდა სასოფლო–სამეურნეო სავარგულები, განადგურდა მოსავალი, დაზიანდა საცხოვრებელი სახლები, ხიდები და გზები.

ცენტრალური ბიუჯეტიდან ზარალის ასანაზღაურებლად 35.000 ლარი გამოიყო. თანხა ინფრასტრუქტურული ზარალის ანაზღაურებას მოხმარდება.

ადიგენის მუნიციპალიტეტის გამგებლის ზაქარია ენდელაძის განმარტებით, ტენდერში შპს „ტყუპები 2013“–მა გაიმარჯვა და სამშენებლო მასალებს მოსახლეობაზე აღნიშნული ფირმა გასცემს.

შეგახსენებთ, რომ 2014 წლის 14 სექტმებრის სტიქიის დროს ზარალი სპეციალურმა კომისიამ ორი მიმართულებით, სოფლის მეურნეობისა და ინფრასტრუქტურის კუთხით შეისწავლა.

სოფლის მეურნეობის კუთხით მიყენებულმა ზარალმა მილიონ 57 ათას 52 ლარი შეადგინა, ხოლო ინფრასტრუქტურის მიმართულებით 35 ათას 740 ლარი.

[თინათინ ზაზაძე, ადიგენი]