სტიქიამ ადიგენის სოფლები დააზარალა

ძლიერი წვიმა დაახლოებით ნახევარ საათს, სეტყვა კი ათ წუთზე მეტ ხანს გაგრძელდა. სტიქიამ ამჯერად ადიგენის მუნიციპალიტეტის სოფლები იმერთუბანი, ლელოვანი, კახარეთი, ჩორჩანი და სმადა დააზიანა.

„ხეებს ფოთოლი აღარ შერჩა, ნაყოფზე რომ აღარაფერი ვთქვათ. ვაშლი და კაკალი სულ გაანადგურა, დამტვრეულია ტოტები. თოვლივითაა სოფელი გადათეთრებული“, - ამბობს იმერთუბანში მცხოვრები გელა სირბილაძე და ამატებს, რომ ძლიერმა ქარმა ფუტკრების სკებიც გადააბრუნა.

ადიგენის მუნიციპალიტეტის გამგეობაში სტიქიის შედეგად მიყენებული ზარალის ოდენობის შესახებ ჯერ არ იციან.

„ახლა გავდივართ ადიგენიდან სმადაში, ჯერ ზუსტად არ ვიცით სად რა მდგომარეობაა“, - გვითხრა სატელეფონო საუბარში ადიგენის მუნიციპალიტეტის გამგებლის მოადგილემ არსენ ბალახაშვილმა.



[თამუნა უჩიძე, ადიგენი]