სტიქიამ ადიგენი ერთი მილიონი ლარით აზარალა

14 სექტემბერს ადიგენის მუნიციპალიტეტში სტიქიამ ცხრა სოფელი დააზარალა. სპეციალურმა კომისიამ ზარალი ორი მიმართულებით, სოფლის მეურნეობისა და ინფრასტრუქტურის კუთხით შეისწავლა.

ადიგენის მუნიციპალიტეტის გამგეობაში განმარტავენ, რომ სოფლის მეურნეობის კუთხით მიყენებულმა ზარალმა მილიონ 57 ათას 52 ლარი შეადგინა, ხოლო ინფრასტრუქტურის მიმართულებით 35 ათას 740 ლარია.

აღნიშნული მონაცემები შესაბამის სამინისტროებს დღეს გადაეგზავნება.

"გადავაგზავნით სოფლის მეურნეობისა და ინფრასტრუქტურის სამინისტროებში, მოლოდინი გვაქვს, რომ მოსახლეობას დაეხმარებიან. როგორ იქნება ეს ყველაფერი, ჯერ ვერ გეტყვით", – ამბობს გამგებლის მოადგილე არსენ ბალახაშვილი.

რა რეაგირება მოჰყვება ადიგენის მუნიციპალიტეტიდან გადაგზავნილ შედეგებს, ჯერ უცნობია. გამგეობაში განმარტავენ, რომ ადგილობრივი ბიუჯეტიდან მოსახლეობის დახმარების საშუალება არ აქვთ.

[თამარ თოთაძე, ადიგენი]