სრულიად საქართველოს მუფთის გასაიდუმლოებული ვიზიტი სამცხე–ჯავახეთში?

სრულიად საქართველოს მუფთის ჯემალ პაქსაძის მანქანა დღეს ახალციხეში, სამცხე–ჯავახეთის სამხარეო ადმინისტრაციის შენობის ეზოში დაახლოებით 4 საათის განმავლობაში იდგა. თუმცა, იმყოფებოდა თუ არა ჯემალ პაქსაძე ახალციხეში, ვის შეხვდა და რა თემაზე ისაუბრა, ამ დრომდე უცნობია.

სწორედ ამ მანქანით იმყოფებოდა ჯემალ პაქსაძე ადიგენის მუნიციპალიტეტის სოფელ მოხეში მიმდინარე წლის მაისში, როცა იგი ადგილობრივ ხელისუფლებასთან ერთად მუსლიმ მოსახლეობას შეხვდა.შეხვედრის შესახებ ინფორმაცია "სამხრეთის კარიბჭემ" გაავრცელა.




სამხარეო ადმინისტრაციაში საზოგადოებასთან ურთიერთობის სამსახურის მთავარმა სპეციალისტმა ია გოგატიშვილმა განაცხადა, რომ ჯემალ პაქსაძის ვიზიტის შესახებ მას ინფორმაცია არ აქვს და გუბერნატორი აკაკი მაჭუტაძე სულ სხვა შეხვედრაზე იმყოფებოდა.

"გუბერნატროს შეხევდრა საკონსულტაციო საბჭოს სამუშაო ჯგუფებთან აქვს, წარმომადგენლები მთელი რეგიონის, მასშტაბით არიან", – განაცხადა ია გოგატიშვილმა.

მისივე თქმით, რადგან შეხევდრა დახურული იყო ჟურნალისტებს დასწრების უფლება არ ჰქონდა.

ესწრებოდა თუ არა სამუშაო ჯგუფების შეხვედრას აკაკი მაჭუტაძე, "სამხრეთის კარიბჭემ" ინფორმაცია სამუშაო ჯგუფების წარმომადგენლებთან გადაამოწმა, აღმოჩნდა, რომ შეხვედრებს სამცხე–ჯავახეთის გუბერნატორი არ ესწრებოდა.

"სამუშაო შეხვედრა გვქონდა. ერთმანეთს აზრები გავუზიარეთ. სხვადასხვა ჯგუფებში ვმუშაობდით, ეს ქალბატონ ია გოგატიშვილთან გადაამოწმეთ. ბატონ კაკოს გუბერნიაში შევხვდი, მაგრამ ჩვენი გამგებელი რაიონში არ არის და ამიტომ ხშირად მიწევდა გარეთ გამოსვლა. შეიძლება იყო კიდეც შემოსული", – ამბობს ბორჯომის მუნიციპალიტეტის გამგებლის მოადგილე რევაზ კალაძე.

"რამდენიმე ჯგუფად ვიყავით დაყოფილი და გუბერნატორი ჩვენს შეხვედრას არ დასწრებია, მაგრამ შეიძლება სხვას დაესწრო",–ამბობს ადიგენის მუნიციპალიტეტის საკრებულოს წევრი ალექსი გიგოლაშვილი.

"მე ინფრასტრუქტურის და ტურიზმის ჯგუფში ვარ, სულ ხუთი ჯგუფია. დღეს შეხვედრას გუბერნატორის წარმომადგენელი ესწრებოდა", – ამბობს ასპინძის მუნიციპალიტეტის საკრებულოს თავმჯდომარის მოადგილე ნუგზარ ლონდარიძე.

სრულიად საქართველოს მუფთის ვიზიტის შესახებ ინფრომაცია არ ჰქონდა სამცხე–ჯავახეთის მუფთს მამუკა ვაშაყმაძეს.

"თქვენგან მესმის პირველად. ცუდად ვარ და სახლში ვიმყოფები", – განაცხადა მამუკა ვაშაყმაძემ.

ვიზიტის შესახებ ინფორმაცია არ აქვს არც ჭელის მეჩეთის წინამძღვარს ჯამბულ აბულაძეს, რომელიც ჯემალ პაქსაძეს მოსახლეობის შეცდომაში შეყვანაში ადანაშაულებს: "ვიცით რომ აქეთ არის წამოსული. ჯერ არანაირ კავშირზე არ გამოდის. არ დავკავშირებივარ ის ჩემთვის არის არალეგიტიმური პიროვნება, ამიტომ მის აქ ჩამოსვლას დიდი მნიშვნელობა არ აქვს. მან შეცდომაში შეიყვანა სახელმწიფოც და ჩვენი საზოგადოებაც და ამისთვის პასუხს აგებს".

"სამხრეთის კარიბჭემ" ინფორმაციის გადამოწმება თავად სამცხე–ჯავახეთის გუბერნატორთან აკაკი მაჭუტაძესთან სცადა. თუმცა, გუბერნატორმა ჟურნალისტის ზარებს არ უპასუხა. ასევე "სამხრეთის კარიბჭემ" დაკავშირება სცადა სრულიად საქართველოს მუფთთან ჯემალ პაქსაძესთან. თუმცა, ტელეფონს არც პაქსაძემ არ უპასუხა, მოგვიანებით კი ტელეფონი გამორთო.

შეგახსენებთ, რომ 18 ოქტომბერს ადიგენის მუნიციპალიტეტის სოფელ მოხეში მუსლიმები და ქრისტიანები ერთმანეთს დაუპირისპირდნენ. დაპირისპირება სოფელ მოხეში, ძველი მეჩეთის შენობის დემონტაჟის დაწყებას მოჰყვა.

ამ წუთებში ჭელის მეჩეთის წინამძღვარი ჯამბულ აბულაძე ადიგენის მუნიციპალიტეტის ხელმძღვანელობას ხვდება, მისი თქმით შეხვედრის შესახებ დეტალებს მოგვინიანებით მოგვაწვდის: "ადიგენის გამგეობიდან დამიკავშირდნენ და შეხვედრა მთხოვეს, სავარაუდოდეს მოხეში არსებულ სადავო შენობის თაობაზე", – ამბობს ჯამბულ აბულაძე.

ჯამბულ აბულაძის ვარაუდით, სრულიად საქართველოს მუფთის სამცხე–ჯავახეთში ვიზიტიც ამ საკითხს უკავშირდება.

[თინათინ ზაზაძე, ახალციხე]