მუსლიმი სასულიერო პირები ერთმანეთს უპირისპირდებიან

ჭელის მეჩეთის წინამძღვარი ჯამბულ აბულაძე სრულიად საქართველოს მუფთს ჯემალ პაქსაძეს მოსახლეობის შეცდომაში შეყვანაში ადანაშაულებს. მისი თქმით, ადიგენის მუნიციპალიტეტის სოფელ მოხეში მდებარე სადავო შენობის გამო მოსახლეობის დაპირისპირება მისი საქციელითაა განპირობებული.

„ეს ყველაფერი არის ჯემალ პაქსაძისა და ადგილობრივი ხელმძღვანელობის დანაშაულებრივი მოქმედებების ბრალი. არჩევნების წინ იყვნენ ჩამოსული და მუსლიმებს დაპირდნენ, რომ შენობას დაუბრუნებდნენ. ამიტომ, ხალხს იმედი მიეცა და ის მივიღეთ დღეს სახეზე, რაც მივიღეთ. რატომ არ ჩამოდის დღეს, რომ თავისი დაპირების შესახებ ხალხს პასუხი გასცეს?! პაქსაძე არალეგიტიმურია, ის ვეღარ იქნება ჩვენი წინამძღვარი, მოსახლეობას ატყუებს“.

წინასაარჩევნო პერიოდისგან განსხვავებით, ახლა პაქსაძე აცხადებს, რომ მოხის მეჩეთის საკითხთან დაკავშირებით, ადიგენში წასვლას არ აპირებს. მისი თქმით, იქ არის როგორც სამცხე-ჯავახეთის მუფთი, ასევე ადგილობრივი ხელისუფლება, ამიტომ, მის ჩართულობას ამ ეტაპზე საჭიროდ არ მიიჩნევს. იგი წინასაარჩევნოდ დაპირებასაც უარყოფს.

„დაპირება არ მიგვიცია, ეს იყო თხოვნა, - აცხადებს პაქსაძე და ამატებს, რომ ჯამბულ აბულაძის დაპირისპირებაზე არ ისაუბრებს, -თუ რაიმე უნდა, თავად მითხრას, ამის შესახებ პირველად მესმის“.

ქართველ მუსლიმთა კავშირის თავმჯდომარის მოადგილე ტარიელ ნაკაიძე კი ირწმუნება, რომ პაქსაძისგან პოლიტიკური აგიტაცია ჩვეული მეთოდია: „იგი „ნაციონალების“ დროსაც ასე იყო და ახლაც ასე იქცევა. ვიცი, რომ ჩამოვიდა და დაპირდა ხალხს, თუ ხმას მისცემდნენ „ოცნებას“, შენობას მიიღებდნენ. ბუნებრივია, აღელვებული იქნება საზოგადოება და ამ შემთხვევაში მართალია ჯამბული“.

ნაკაიძის განცხადებთ, ჯემალ პაქსაძის პოზიცია მერყევია მუსლიმი თემის ინტერესების დაცვისას, რადგან ის ცდილობს არ გააღიზიანოს ის ადამიანები, ვინც იგი მოიყვანა მუსლიმთა სამმართველოს სათავეში: „ის ხომ ყველასთვის ცნობილია, რომ მუსლიმთა სამმართველო დააფუძნეს ისეთმა პირებმა, რომლებიც არ არიან მუსლიმები. ეს სამმართველო არის შინაგან საქმეთა სამინისტროს წარმოამდგენლების დაფუძნებული. ბევრი დეტალია, რომელზე საჯაროდ საუბარს ვერიდებით“.

ნაკაიძის თქმით, რადგან იგი მუსლიმთა კავშირის წარმომადგენელია, არ სურს, რომ მისი განცხადება ისე გაიგოს საზოგადოებამ თითქოს ორგანიზაციები უპირისპირდებიან ერთმანეთს : „არა მარტო მოხის მეჩეთთან დაკავშირებით, ზოგადად არსებობს პრობლემა: ჯემალი და ეს სტრუქტურა იქცა სახელმწიფოს წარმომადგენლობად მუსლიმ თემში, ვიდრე მსულიმი თემის წარმომადგენლობად სახელმწიფოსთან მიმართებაში. ამიტომ ძალიან არათანმიმდევრული პოილიტიკა აქვს ბატონ ჯემალს ნებისმიერ საკითხთან მიმართებაში“.

[თამუნა უჩიძე, ადიგენი]