ადიგენელი მუსლიმები გუბერნატორსა და გამგებელს ცრუ დაპირებაში ადანაშაულებენ

ადიგენის მუნიციპალიტეტში მცხოვრები მუსლიმები აცხადებენ, რომ ადგილობრივი თვითმმართველობის არჩევნებამდე ადიგენის მუნიციპალიტეტის გამგებელმა ზაქარია ენდელაძემ (მაშინ იგი კანდიდატი იყო) და სამცხე-ჯავახეთის გუბერნატორმა აკაკი მაჭუტაძემ სრულიად საქართველოს მუფთი ჯემალ პაქსაძე ადიგენში ჩაიყვანეს. მათი განცხადებით, გუბერნატორი და გამგებელი მუსლიმებს სოფელ მოხეში მდებარე ყოფილი მეჩეთის შენობის გადაცემას დაჰპირდნენ, თუმცა, არჩევნების შემდეგ ხალხთან მიცემული პირობა დაივიწყეს და ახლა შენობის გადაცემაზე უარს აცხადებენ.

ჯემალ პაქსაძე და ადიგენის მუნიციპალიტეტის გამგებელი არჩევნებამდე რამდენიმე დღით ადრე მოხეში მუსლიმებს ნამდვილად შეხვდნენ. 31 მაისს ამ შეხვედრას „სამხრეთის კარიბჭეც“ ესწრებოდა. აქ ჯემალ პაქსაძემ, რომელიც ზაქარია ენდელაძის გვერდთ იდგა განაცხადა: „სახელმწიფო გვპირდება, რომ შენობა ჩვენ მფლობელობაში გადმოვა. გვაქვს ძალიან კარგი შეხვედრები და ძალიან კარგი პასუხიც, გადაწყვეტილია საკითხი და ღმერთით, ეს შენობა ჩვენ მფლობელობაში იქნება“.



მაშინ, შეხვედრის დასრულების შემდეგ, ზაქარია ენდელაძემ „სამხრეთს კარიბჭეს“ კითხვებს არ უპასუხა და შეხვედრა უკომენტაროდ დატოვა.
არჩევნების შემდეგ ადგილობრივმა თვითმმართველობამ მუსლიმებს შენობის გადაცემაზე უარი უთხრა.

„შენობის იურიდიული სტატუსია კლუბი. ასეა ბოლო ათეული წლებია და ამ სტატუსს მე ვერ შევცვლი. ახლა ამ შენობის რეაბილიტაციისთვის ტენდერია გამოცხადებული, რეაბილიტაციის პარალელურად გადავწყვეტთ რა იფუნქციონირებს ამ შენობაში“, - აცხადებს ზაქარია ენდელაძე.

კითხვაზე, თუ რატომ არ განაცხადა მოხეში გამართულ შეხვედრაზე მუსლიმ მრევლთან იმის შესახებ, რომ შენობის სტატუსი კლუბი იყო და ამას ვერ შცვლიდნენ, ენდელაძე გვპასუხობს: „ეს კითხვა ჩემთვის არავის დაუსვამს და ბუნებრივია, პასუხიც არ გამიცია. თან მაშინ არ ვიცოდი ამ შენობის სტატუსის შესახებ“.

ადიგენში მოქმედი ერთადერთი არასამთავრობო ორგანიზაცია „საზოგადოებრივი დარბაზის“ ხელმძღვანელი გოდერძი კუბლაშვილი მიიჩნევს, რომ „თუ მუფთმა შენობის გადაცემის პირობა გამგებლის გვერდით დადო და ამ დროს ენდელაძემ კომენტარი არ გააკეთა, ეს გამგებლის მხრიდან არასწორი სვლა იყო“.

ენდელაძე კი ირწმუნება, რომ მოხეში მუფთს სპონტანურად შეხვდა: „ეს იყო სპონტანური მეგობრული და თბილი შეხვედრა. შემიძლია თამამად დავიფიცო კიდეც, რომ დაპირება შენობის გადაცემის შესახებ არც მე და არც ბატონ აკაკის, არ მიგვიცია“.

სამცხე-ჯავახეთის გუბერნატორი აკაკი მაჭუტაძე „სამხრეთის კარიბჭესთან“ კომენტარს არ აკეთებს, სამხარეო ადმინისტრაციაში საზოგადოებასთან ურთიერთობის სამსახურის მთავარი სპეციალისტი ია გოგატიშვილი კი აცხადებს, რომ გუბერნატორი ამ შეხვედრას არ დასწრებია და შესაბამისად არც რაიმე დაპირება გაუცია.

[თამუნა უჩიძე, ახალციხე]