ჭელის მეჩეთის ეზოში ისევ ხალხმრავლობაა

სამცხე-ჯავახეთის მუფთის მამუკა ვაშაყმაძის თქმით, სრულიად საქართველოს მუსლიმთა სამმართველოს მუფთი ჯემალ პაქსაძე მას დღის მეორე ნახევარში დაუკავშირდა და აცნობა, რომ ჭელაში მუსლიმებთან შესახვედრად აჭარის მთავრობის წარმომადგენლებთან ერთად მოდიოდა.

"სამხრეთის კარიბჭე" ჯემალ პაქსაძეს ტელეფონით დაუკავშირდა. როგორც მან განაცხადა, ის ამ წუთებში მარტო იმყოფება და მთავრობის წარმომადგენლები არ ახლავს. კითხვაზე, მართლა აპირებდნენ თუ არა მთავრობის წარმომადგენლები მუსლიმებთან შეხვედრას, პაქსაძემ გვიპასუხა, რომ მათ ნაცვლად ვერაფერს გვეტყოდა.

"სამხრეთის კარიბჭემ" ჯემალ პაქსაძეს იმის შესახებაც ჰკითხა, რა გადაწყვეტილება მიიღეს სოფელ ჭელაში მინარეთის აღმართვის შესახებ.

"ჯერ საკანონმდებლო საკითხები მოგვარებული არ არის და მოვლენებს წინ ვერ გავუსწრებთ", - გვიპასუხა ჯემალ პაქსაძემ.

მან პასუხი ვერც იმის შესახებ გაგვცა, როდის შეხვდება მუსლიმ მრევლს.

მეჩეთის ეზოში შეკრებილები დაშლას არ აპირებენ და აცხადებენ, რომ დაელოდებიან პაქსაძის გამოჩენას და პასუხს, მიღებული გადაწყვეტილების შესახებ.

[sknews.ge]