რა შედეგებით დაასრულა საჩივრების განხილვა ახალქალაქის საოლქო კომისიამ

N40 ახალქალაქის საოლქო საარჩევნო კომისია საჩივრებს დღეს, 19 ივნისს დაახლოებით 6 საათს იხილავდა. ამ ხნის განმავლობაში კომისიამ 8 საჩივარი განიხილა და 2 უბანი ხელახლა გადათვალა.

საოლქო კომისიამ N1, N10, N16, N23, N25 და N46 საუბნო კომისიის თავმჯდომარეებს ხელფასიდან 500-500 ლარი ჩამოაჭრა. აღნიშნული ექვსი უბნიდან კი N1 და N23-ე უბნები ხელახლა გადათვალა.

N40 ახალქალაქის საოლქო საარჩევნო კომისიის თავმჯდომარის პაატა ფანჯაკიძის განცხადებით, N1 უბანზე ხმების ხელახლა გადათვლის შემდეგ არცერთი შეცდომა და ხარვეზი არ დაფიქსირებულა. N23 უბანზე კი ერთი ბიულეტენით ზედმეტი აღმოჩნდა: „მითითებული იყო 50 და დავწერეთ 49“.

N23 უბანზე 100-მდე ამომრჩეველია და აქ „არასაპარლამენტო ოპოზიციის“ წარმომადგენელი „ქართული ოცნების“ კანდიდატს 8 ხმით უგებს.
ვიდრე დარბაზში საჩივრების განხილვას „არასაპარლამენტო ოპოზიციის“ ერთ-ერთი ლიდერი კახა კუკავა ესწრებოდა სხდომა საპროტესტო აქციის ფონზე მიმდინარეობდა. თუმცა, მას შემდეგ რაც კუკავამ საოლქო კომისიის შენობა დატოვა, აქციის მონაწილეებიც დაიშალნენ.

კუკავამ სხდომის დარბაზი მაშინ დატოვა, როცა N1 საუბნო კომისიის კენჭისყრის შედეგებს ხელახლა ითვლიდნენ. მისი განცხადებით იგი ბრძოლას სამართლებრივი გზით, ჯერ ცენტრალურ საარჩევნო კომისიაში, შემდეგ კი სასამართლოში გააგრძელებს. თუმცა, მანამდე გეგმავს, რომ მომხდარის შესახებ არასამთავრობო ორგანიზაციების და დიპლომატიური კორპუსის წარმომადგენლებს გააცნოს.

„ხვალ 12 საათზე თბილისში პრეზენტაციას გავმართავთ, - აცხადებს იგი და ამატებს, რომ სავარაუდოდ საპროტესტო აქციებიც გაგრძელდება - აქციები დაიწყო ქუთაისში, მარტვილში, შესაძლოა ეს საპროტესტო ტალღა თბილისსაც გადაედოს“.

კუკავა, საოლქო კომისიის გადაწყვეტილებას დისციპლინურ საკითხებთან დაკავშირებით, ცინიზმს უწოდებს: „აღიარებ რომ იყო დარღვევა, რომ ადგილი ჰქონდა გაყალბებას, ოღონდ გაყალბებული მაჟორიტარი და გამგებელი ისევ ძალაში რჩება“.

ახალქალაქის ოლქში საუბნო კომისიების, დაახლოებით, 70% გასაჩივრებული იყო. ახალგაზრდა იურისტთა ასოციაციისა და „მრავალეროვანი საქართველოს“ წარმომადგენლები რიგ უბნებზე შედეგების ბათილად ცნობას და არჩევნების ხელახლა ჩატარებას ითხოვდნენ. იგივე იყო „არასაპარლამენტო ოპოზიციის“ მოთხოვნაც, თუმცა კომისია მხოლოდ დისციპლინური პასუხისმგებლობის დაკისრებით შემოიფარგლა .


[თამუნა უჩიძე, ახალქალაქი]