სამცხე-ჯავახეთის სამ საარჩევნო ოლქში 41 საჩივარი შევიდა

საჩივრების ავტორები ძირითადად არასამთავრობო ორგანიზაციები არიან: „მრავალეროვანი საქართველო“ და „ახალგაზრდა იურისტთა ასოციაცია“. მათ შემდეგ, ყველაზე მეტი საჩივარი ოლქებში „ერთიან ნაციონალურ მოძრაობას“ აქვს შეტანილი.

#45 ბორჯომი-ასპინძის საარჩევნო ოლქში შესული 14 საჩივრიდან, შვიდი „ახალგაზრდა იურისტთა ასოციაციას“ ეკუთვნის. ორგანიზაცია საუბნო კომისიების წარმომადგენლებისთვის დისციპლინური პასუხისმგებლობის საკითხის დაყენებასა და ბორჯომის 28-ე უბნის შედეგების ბათილად ცნობას ითხოვს.

საუბნო კომისიების წევრებისათვის დისციპლინური პასუხისმგებლობის საკითხის დაყენებას ითხოვს „სამართლიანი არჩევნები“ ერთი, „გაერთიანებული დემოკრატიული მოძრაობა“ კი სამი საჩივრით.

#45-ე ოლქში შემავალი, ახალქალაქის ექვსი უბნის ოქმის გახსნასა და შედეგების ხელახლა გადათვლას ითხოვს „ნაციონალური მოძრაობა“. იგივე საჩივარი შეიტანეს საოლქო კომისიაში „ლეიბორისტებმაც“.

ყველაზე მეტი, შვიდი საჩივარი შეიტანა #46 საარჩევნო ოლქში „მრავალეროვანმა საქართველომ“, რომელიც კენჭისყრის დღეს პროცედურების დარღვევასა და ხმის მიცემის პროცედურების დარღვევას ეხება. ერთი საჩივარი კი შეტანილი აქვს „სამართლიან არჩევნებს“. იგი ადმინისტრაციული სამართალდარღვევის ოქმის შედგენას ითხოვს.

ახალქალაქის საარჩევნო ოლქში, ხუთი საჩივარი შევიდა „ნაციონალური მოძრაობიდან“. საჩივრები საარჩევნო კომისიების ინვენტარიზაციასა და საოლქო საარჩევნო კომისიის წევრების დისციპლინური პასუხისმგებლობის საკითხის დაყენებას ეხება.

#44-ე ახალციხე-ადიგენის საოლქო საარჩევნო კომისიამ საჩივრების განხილვა დღეიდან, 11 ოქტომბრიდან დაიწყო. განხილვა უკვე მიმდინარეობს ახალქალაქის საოლქო კომისიაშიც.

რაც შეეხება, #45-ე ასპინძა-ბორჯომის საარჩევნო ოლქს, აქ განხილვის პროცესი ჯერ არ დაწყებულა. როგორც საოლქო კომისიის თავმჯდომარე ლევან დევიძე აცხადებს, განხილვას კანონით გათვალისწინებულ ვადაში დღის ბოლოს ან ხვალ, 12 ოქტომბერს დაიწყებს.

[ლუბა გიორგაძე, ახალციხე]