ახალქალაქში 5 უბნის შედეგებს ხელახლა დაითვლიან

„არასაპარლამენტო ოპოზიციამ“ (კახა კუკავა, ფიქრია ჩიხრაძე) სასამართლოში N40 ახალქალაქის საარჩევნო ოლქის 20 უბნის შედეგები გაასაჩივრა. სააპელაციო სასამართლოს გადაწყვეტილებით ხელახლა მხოლოდ 5 უბნის შედეგები გადაითვლება.

სააპელაციო სასამართლოს გადაწყვეტილება 5 უბნის შედეგების ხელახლა გადათვლის შესახებ N40 ახალქალაქის საოლქო საარჩევნო კომისიამ 1 ივლისს მიიღო.

სააპელაციო სასამართლოს 27 ივნისის გადაწყვეტილებით ახალქალაქის საოლქო კომისიას 46-ე უბნის, 30 ივნისის გადაწყვეტილებით კი მე–14, 28-ე, 37-ე და 66-ე უბნების შედეგების ხელახლა გადათვლა დაევალა.

„ჩვენ ამ უბნებზე ვითხოვდით გადათვლას და დარღვევების აღმოჩენის შემთხვევაში ბათილად ცნობას. სამწუხაროდ, ფორმულირება არასწორად გავუკეთეთ, უკეთესი იქნებოდა თუ მოთხოვნაში პირდაპირ ბათილად ცნობას ჩავწერდით“, - აცხადებს „არასაპარლამენტო ოპოზიციის“ ერთ-ერთი ლიდერი მანანა ნაჭყებია.

მისი თქმით, თუ ახალქალაქში რამდენიმე ტოტალურად გაყალბებულ უბანზე განმეორებითი არჩევნები შედგებოდა, როგროც მაჟორიტარული, ასევე პროპორციული სიით, „არასაპარლამენტო ოპოზიციის“ შედეგები გაუმჯობესდებოდა.

[თამუნა უჩიძე, ახალციხე]