ახალქალაქის სასამართლო N1 საარჩევნო უბნის საქმეს განიხილავს

19 ივნისი, საჩივრების განხილვა ახალქალაქში

სასამართლო პროცესზე ერთ–ერთი მტკიცებულება „მრავალეროვანი საქართველოს“ დამკვირვებლის მიერ გადაღებული ვიდეომასალაა. ფირზე ჩანს, რომ მას შემდეგ რაც აღნიშნული უბანი დაილუქა, სამაგიდო სიები არ დაიხურა. პარალელურად მიმდინარეობდა საარჩევნო ბიულეტენების დათვლაც. ფირზე კარგად ჩანს "მრავალეროვანი საქართველოს" წარმომადგენლის მითითებაც, რომელიც ამბობს, რომ იქ რაღაც ხდება. თუმცა, მიუხედავად ამისა, სამაგიდო სიებთან კოისიის წევრები მუშაობას აგრძელებენ.

„გვაინტერესებს, რას გვეტყვის სასამართლო. პირდაპირ არის ვიდეომტკიცებულება, სადაც კომისიის წევრები აწერენ ხელს ამომრჩევლის მაგივრად“, – ამბობს „არასაპარლამენტო ოპოზიციის“ წარმომადგენელი ცენტრალურ საარჩევნო კომისიაში თენგიზ ომანიძე.

აღნიშნულ უბანთან დაკავშირებით, „მრავალეროვან საქართველოს“ საჩივარიც ჰქონდა დაწერილი. ახალქალაქის საოლქო კომისიამ უბანზე ხმები ხელახლა გადათვალა და განაცხადა, რომ ხმების ხელახლა გადათვლისას არცერთი შეცდომა და ხარვეზი არ დაფიქსირებულა.

„არასაპარლამენტო ოპოზიციამ“ ახალქალაქის საარჩევნო ოლქის საარჩევნო უბნებზე სასამართლოში ორი სარჩელი შეიტანა. ერთი, რომელიც N19, N34 და N46 საარჩევნო უბნებზე კენჭისყრის შედეგების გაუქმებას ითხოვდა, სასამართლომ გუშინ, 22 ივნისს განიხილა. მოსამართლემ სარჩელი არ დააკმაყოფილა.

„ჩვენ წარვადგინეთ მოწმეთა ჩვენებები, გვქონდა ნივთმტკიცებები ოქმების სახით, N19 და N46 უბნებთან დაკავშირებით. საოლქო კომისია დაგვეთანხმა, რომ ხმების დათვლისას ჩვენი წარმომადგენლები ნამდვილად გამოაზევეს მიუხედავად ამისა, სასამართლომ მიიღო გაუგებარი გადაწყვეტილებები და არ დააკმაყოფილა საჩივარი“, – ამბობს თენგიზ ომანიძე და ამატებს, რომ სასამართლოს გუშინ მიღებულ გადაწყვეტილებას გაასაჩივრებენ.

რაც შეეხება დღევანდელ პროცესს, სასამართლო ჯერ არ დასრულებულა.

[თინათინ ზაზაძე, ახალქალაქი]