ახალქალაქის 23–ე უბანზე ხმებს თავიდან დაითვლიან

ახალქალაქის საოლქო საარჩევნო კომისიაში საჩივრების განხილვა ამ წუთებშიც მიმდინარეობს. უკვე გადაწყვეტილია, რომ 23–ე უბანზე ხმები თავიდან დაითვლება. თუმცა, ხმებს დღეს დაითვლიან თუ ხვალ ჯერ გარკვეული არ არის.

"ახალგაზრდა იურისტთა ასოციაციის" წარმომადგენლის ქეთევან ბებიაშვილის თქმით, დღევანდელ სხდომაზე რამდენიმე დარღვევა დაფიქსირდა: "ერთ–ერთი 23–ე უბანი იყო, სადაც ოქმზე კომისიის წევრების ხელმოწერა არ იყო დაფიქსირებული. გამოდის, რომ ეს ოქმი არ არის დადასტურებული და საჭიროა მისი თავიდან გადათვლა".

მისივე თქმით, ასევე გადასახედია 46–ე უბნის შემაჯამებელი ოქმიც, სადაც გარკვეული ხარვეზები დაფიქსირდა.

"46–ე უბნის ოქმს თან ახლავს შესწორების ოქმი, სადაც ძალიან ბევრი ტექნიკური ხარვეზებია, დარჩენილია ცარიელი გრაფები. ასეთი დარღვევები დისციპლინალურ პასუხისმგებლობას ითვალისწინებს. თუმცა, ეს კომისიის გადასაწყვეტია", – ამბობს ბებიაშვილი.

შგახსენებთ, რომ N40 ახალქალაქის საარჩევნო ოლქში საჩივრების განხილვა მიმდინარეობს. კომისიამ დღეს რვა საჩივარი უნდა განიხილოს. სხდომას "საქართველოს ახალგაზრდა იურისტთა ასოციაციისა" და მედიის წარმომადგენლებთან ერთად, "არასაპარლამენტო ოპოზიციის" ერთ–ერთი ლიდერი კახა კუკავა ესწრება. სხდომის პარალელურად მიმდინარეობს საპროტესტო აქციაც. შენობასთან მობილიზებულია პოლიცია. სხდომის დარბაზის შესასვლელთან იმყოფება სამცხე–ჯავახეთის სამხარეო სამმართველოს უფროსი თეიმურაზ კალანდაძე.

[sknews.ge]