ახალქალაქის საოლქოში საჩივრების განხილვა საპროტესტო აქციის ფონზე იწყება

N40 ახალქალაქის საოლქო საარჩევნო კომისიაში ამ წუთებში სხდომა იწყება, რომელსაც "საქართველოს ახალგაზრდა იურისტთა ასოციაციისა" და მედიის წარმომადგენლებთან ერთად, "არასაპარლამენტო ოპოზიციის" ერთ–ერთი ლიდერი კახა კუკავა ესწრება.

კომისია დღეს რვა საჩივარს განიხილავს, რომელთა ნაწილი ეხება იმას, რომ ოქმებში ბალანსი არ არის დაცული. სხდომაზე არ იმყოფება ცენტრალური საარჩევნო კომისიის წარმომადგენელი სოსო პარუნაშვილი, რომელსაც კახა კუკავამ გუშინ სუს–ის ოფიცერი უწოდა.

სხდომის პარალელურად მიმდინარეობს საპროტესტო აქციაც, სადაც სიტყვით გამოდის ნორიკ კარაპეტიანი.

ახალქალაქის საოლქოსთან მობილიზებულია პოლიცია. სხდომის დარბაზის შესასვლელთან დგას სამცხე–ჯავახეთის სამხარეო სამმართველოს უფროსი თეიმურაზ კალანდაძე.

შეგახსენებთ, რომ "არასაპარლამენტო ოპოზიციის" წარმომადგენლების ინფორმაციით, ახალქალაქის ოლქში "ქართულმა ოცნებამ" ხმები გააყალბა.

[sknews.ge]