დაპირისპირება ახალქალაქის საოლქო საარჩევნო კომისიაში [Video]

სხდომის დასრულებიდან რამდენიმე წუთში, საოლქო კომისიაში „არასაპარლამენტო ოპოზიციის“ ლიდერები კახა კუკავა და მანანა ნაჭყეპია მივიდნენ. მათ კომისიის წევრებს, საჩივრების ობიექტური განხილვა სთხოვეს.

საოლქო კომისიაში ვითარება მას შემდეგ დაიძაბა, რაც ოლქში ცესკოს წარმომადგენელმა სოსო პარუნაშვილმა „არასაპარლამენტო ოპოზიციის“ ლიდერებსა და მათ მხარდამჭერებს შენობის დატოვება სთხოვა, კუკავამ კი პარუნაშვილს სუს-ს ოფიცერი უწოდა.

პარუნაშვილმა ოთახი დატოვა, თუმცა, ამ დროს იქ მყოფთაგან ერთ-ერთმა, იმ კარის მინა ჩაამტვრია, რომლიდანაც პარინაშვილი რამდენიმე წამის წინ გავიდა.

კუკავას წარმომდგენლების განცხადებით მინა პარუნაშვილმა დაამტვრია, საოლქო კომისიის წევრები კი ირწმუნებიან, რომ კარს ხელი კუკავას აქტივისტმა ნორიკ კარაპეტიანმა დაარტყა.

ამ ინციდენტის შემდეგ კარაპეტიანს, მარჯვენა ხელი ჯიბეში ედო. „სამხრეთის კარიბჭის“ თხოვნაზე, ხელი ეჩვენებინა, გაღიზიანდა და კამერას ხელი კრა. მან ორივე ხელი მას შემდეგ აჩვენა მედიის წარმომადგენლებს, რაც კამერებს მოშორდა.



[თამუნა უჩიძე, ახალქალაქი]