'მრავალეროვანი საქართველო' ახალქალაქის პირველი უბნის შედეგების გაუქმებას ითხოვს

N40–ე ახალქალაქის ოლქში გამართულ სხდომაზე, სადაც საჩივრების განხილვა მიმდინარეობს, ახალქალაქის პირველ უბანზე გადაღებული ფირი აჩვენეს, რომელიც "მრავალეროვანი საქართველოს" წარმომადგენელმა გადაიღო.

ფირზე ჩანს, რომ მას შემდეგ რაც აღნიშნული უბანი დაილუქა, სამაგიდო სიები არ დაიხურა. ამის პარალელურად მიმდინარეობდა საარჩევნო ბიულეტენების დათვლაც. ფირზე კარგად ჩანს "მრავალეროვანი საქართველოს" წარმომადგენლის მითითებაც, რომელიც ამბობს, რომ იქ რაღაც ხდება. თუმცა, მიუხედავად ამისა სამაგიდო სიებთან ადამიანები მუშაობას აგრძელებენ.

"მრავალეროვანი საქართველოს" წარმომადგენელი ირმა ბასილაშვილი, რომელმაც აღნიშნულ ფაქტზე საჩივარი დაწრა, დღევანდელ სხდომას ესწრება. ბასილაშვილი ითხოვს, რომ პირველი უბნის შედეგები ბათილად ცნონ და ამ უბანზე არჩევნები ხელახლა ჩატარდეს.

"აქ უნდა დაეკისროთ ადმინისტრაციული პასუხისმგებლობა, ამასთანავე აქ იყო გულგრილობაც, რაც სისხლის სამართლის დანაშაულია", – ამბობს ირმა ბასილაშვილი, რომელმაც საკუთარი პოზიცია დღევანდელ სხდომაზეც დააფიქსირა.

მას ეთანხმება "ახალგაზრდა იურისტთა ასოციაციის" წარმომადგენელი ქეთევან ბებიაშვილიც. მისი თქმით, ეს არის თემა, რომელზეც პროკურატურამ უნდა იმუშაოს. მათ პოზიციას იზიარებს "არასაპარლამენტო ოპოზიციის" ერთ–ერთი ლიდერი კახა კუკავა, რომელიც საჩივრების განხილვას ესწრება.

"ფირზე ჩანს, რომ ადამიანები დანაშაულს განზრახ ჩადიან და ეს არ არის უნებლიე შეცდომა", – ამბობს კუკავა.

მიუხედავად აღნიშნული განცხადებებისა, კომისიამ კენჭისყრაზე საკითხი იმის შესახებ დააყენა, რომ გაიხსნას თუ არა დალუქული ბიულეტენები. საბოლოოდ კომისიამ მიიღო გადაწყვეტილება, რომ უბანი უნდა გახსნილიყო. ამ წუთებში ახალქალაქის პირველი საარჩევნო უბნის კენჭისყრის შედეგებს თავიდან ითვლიან. დღესვე გაიხსნება 23–ე უბანიც.

"მრავალეროვანი საქართველოსა" და "ახალგაზრდა იურისტთა ასოციაციის" წარმომადგენლები ამბობენ, რომ უბნის გახსნას აზრი არ აქვს. რადგან სამაგიდო სიებში სავარაუდოდ კორექტირება უკვე გაკეთებულია.

[sknews.ge]