კახა კუკავა: მარგაროზიანი სხდომას ისე წარმართავს, როგორც 'სხადნიაკს'

"მარგაროზიანი სხდომას ისე წარმართავს, როგორც "სხადნიაკს". აქ აბსოლიტურად შეუძლებელია რაიმე პროცედურის დაცვა. ყველა შუამდგომლობა, რომელიც იყო დაყენებული, მოწმის დაკითვაზე, ფოტო და ვიდეო მასალის დემონსტრირებაზე, ასევე ოქმების დათვლაზე, მის მიერ უარყოფილია. თუმცა, იძულებული გახდნენ, რომ რამდენიმე უბანზე დისციპლინალური შენიშვნა გამოაცხადონ. რაც არის კიდევ უფრო მეტი ცინიზმი, "არასაპარლამენტო ოპოზიციას" არანაირ შეღავათს არ უწევენ", – განუცხადა "სამხრეთის კარიბჭეს" კახა კუკავამ.

მისივე თქმით, 17–ე, 19–ე და 22–ე საარჩევნო უბნებზე კომისიის თავმჯდომარეებს შენიშვნებს მისცემენ, თუმცა შედეგები ძალაში დარჩება.

"არის ოქმები, სადაც ერთი და იგივე ხელითაა შესრულებული ყველაფერი, რეალურად კომისიის წევრებს ხმები არც დაუთვლიათ, მათ ნაცვლად დოკუმენტს ხელი სხვა ადამიანმა მოაწერა. ამ კომისიის სხდომაზე ითქვა შედევრი, ერთ–ერთმა კომისიის წევრმა თქვა, შესაკრებთა გადანაცვლებით ჯამი არ იცვლებაო. რაც ეწერა "ოცნების" გრაფაში ჩვენს გრაფაში დაწერეს და პირიქით", – ამბობს კუკავა და ამატებს, რომ ამ საქმეს აუცილებლად გაასაჩივრებენ ჯერ რაიონულ, შემდეგ კი სააპელაციო სასამართლოში: "დარწმუნებული ვარ, რომ ის დოკუმენტები, რომლებიც აქ არის, იძლევა იმის საფუძველს, რომ მოხდეს უბნების გადასინჯვა. მაგალითად: 46–ე საარჩევნო უბნის ოქმში შემაჯამებელი გრაფა საერთოდ არ არის შევსებული, არ არის მითითებული ამომრჩეველთა საერთო რაოდენობა. არსებობს ოქმები, რომლებზეც ხელმოწერები საერთოდ არ არის და ამას ტექნიკურ შეცდომას უწოდებენ".

რაც შეეხება საარჩევნო უბნებზე ტერორსა და მოსყიდვის ფაქტებს, კახა კუკავას თქმით, არსებობენ ადამიანები, რომლებიც ამ ინფორმაციას ფლობენ, თუმცა ისინი დღევანდელ სხდომაზე არ დაუშვეს.

"ახალქალაქში სპეციფიური ვითარებაა, რადგან ბევრი ადგილობრივი სახელმწიფო ენას არ ფლობს, შესაბამისად სხდომაც რუსულ ენაზე მიმდინარეობს. ვითხოვთ დაიკითხონ ის ადამიანები, ვინც იციან რეალურად რა მოხდა",– ამბობს კუკავა.

[sknews.ge]