ახალქალაქის სასამართლომ N1 უბნის შედეგები ბათილად ცნო

„ჩვენი არგუმენტები აღმოჩნდა ძალიან მყარი და პირველი უბნის შედეგები გამოცხადდა ბათილად. ჩატარდება თუ არა მეორე ტური ამ უბანზე, ამას ოლქი გადაწყვეტს“, - ამბობს „არასაპარლამენტო ოპოზიციის“ წარმომადგენელი ცენტრალურ საარჩევნო კომისიაში თენგიზ ომანიძე.

მისივე თქმით „არასაპარლამენტო ოპოზიცია“ ახალქალაქში ბრძოლას კვლავ აგრძელებს. N19, N34 და N46 საარჩევნო უბნებთან დაკავშირებით სააპელაციო სასამართლოში საჩივარი შეტანილი აქვთ. დამატებით 21 საარჩევნო უბნის შედეგებზე კი ხვალ 24 ივნიისს შეიტანენ.

„ვიბრძოლებთ ბოლომდე, კიდევ 3–4 უბნის გაბათილება თუ მოვახერხეთ და დავათმობინეთ ხელისუფლებას, ეს ნიშნავს, რომ დიდი ალბათობით იქნება მეორე ტური გამებლის არჩევნებში“, - აცხადებს თენგიზ ომანიძე.

შეგახსენებთ, რომ „არასაპარლამენტო ოპოზიცია“ და „მრავალეროვანი საქართველო“ N40 ახალქალაქის საარჩევნო ოლქის N1 უბნის შედეგების გაბათილებას ითხოვდნენ. სასამართლო პროცესზე ერთ–ერთი მტკიცებულება „მრავალეროვანი საქართველოს“ დამკვირვებლის მიერ გადაღებული ვიდეომასალა იყო.

[თინათინ ზაზაძე, ახალქალაქი]