სტიქიამ ახალქალაქს 115 000 ლარის ზარალი მიაყენა

ახალქალაქის მუნიციპალიტეტის მერიამ, მას შემდეგ რაც ზარალის ოდენობა დაითვალა, დახმარების თხოვნით რეგიონული განვითარებისა და ინფრასტრუქტურის სამინისტროს მიმართა.

„კანონის თანახმად, როცა ზარალი 20 000 ლარზე მეტია, ინფრასტრუქტურის სამინისტროში ვაგზავნით. თუ დახმარებაზე უარს გვეტყვიან, მუნიციპალიტეტს აქვს იმის შესაძლებლობა, რომ მოსახლეობას დავეხმაროთ“, – ამბობს ახალქალაქის მუნიციპალიტეტის მერი იურიკ უნანიანი.

მისივე თქმით, დაახლოებით 45 ოჯახს, ვისი სახურავიც მნიშვნელოვნად დაზიანდა, შესაკეთებლად თანხას მისცემენ: „დათვლილია რამდენი კვადრატული მეტრი დაზიანდა და პირად ანგარიშებზე დავურიცხავთ ზარალის ოდენობას. რაც შეეხება რიტუალების და კულტურის სახლების სახურავებს, მოვძებნით კომპანიებს, რომლებთანაც პირდაპირი მოლაპარაკების წესით გავაფორმებთ ხელშეკრულებებს, რადგან შენობები სასწრაფოდ გადასახურია“.

შეგახსენებთ, რომ 24 მარტს ძლიაერმა ქარმა ახალქალაქის 17 სოფელში მოსახლეობის საცხოვრებელ სახლებს სახურავები გადახადა. ასევე, დაზიანდა რიტუალების და კულტურის სახლების სახურავებიც.

[თინათინ ზაზაძე, ახალქალაქი]