რატომ არ უნდათ ახალი ხელმძღვანელი მეხუთე სკოლაში? [Video]

მეხუთე სკოლის პედაგოგები აცხადებენ, რომ სკოლის დირექტორობის ყოფილი მოვალეობის შემსრულებელი ნანა დათაშვილი კიდევ აპირებს დირექტორობის შესარჩევ კონკურსში მონაწილეობას. რესურცენტრში ეს იცოდნენ და აცხადებდნენ, რომ სკოლის ხელმძღვანელი არ შეიცვლებოდა. ინგა ვარდიძე კი დღეს, 13 მარტს, მოულოდნელად გამოჩნდა. მათ პიროვნულად ვარდიძის საწინააღმდეგო არაფერი აქვთ, მაგრამ სასწავლო წლის დამთავრებამდე თვენახევრით ადრე სკოლაში ვითარების შეცვლა და არეულობა არ სურთ.

„პირველივე დღეს ეს ქალბატონი ბრძანების კილოთი გვესაუბრება, ოფიციალური ტონით. ჩვენ ასეთი დირექტორი გვყავდა რვა წელიწადი, ძლივს გავძელით და აღარ გვინდა“, - ამბობს მეხუთე სკოლის პედაგოგი ეთერი გვირჯიშვილი.

სკოლაში ვარაუდობენ, რომ ინგა ვარდიძეს ზურგს სხვა უმაგრებს. ამავე სკოლის პედაგოგი მარინა სულაქველიძე ამბობს, რომ მათთვის ყველაზე მიუღებელი ვარდიძის მოულოდნელი გამოჩენა იყო.

„თვენახევრით, დროებით დაინიშნა ახალი დირექტორი, მოულოდნელად მოგვევლინა დღეს და ჩვენთვის ეს იყო ძალიან გასაკვირი და მიუღებელი ფორმა. ეს რაღაც საგანგებო პროცესია. ეს ადმიანი პირველ დღესვე ისეთი ოფიცილური ტონით მოვიდა, რომ ვფიქრობთ, ვიღაცის ზურგი აქვს“, - ამბობს მარინა სულაქველიძე.



შეგახსენებთ, რომ ინგა ვარდიძე საქართველოს განათლებისა და მეცნიერების მინისტრის N1/ა - 167 ბრძანებით, ახალციხის მეხუთე საჯარო სკოლის დირექტორის თანამდებობაზე დროებით მოვალეობის შემსრულებლად 2014 წლის 12 მარტს დაინიშნა. ვარდიძე სკოლაში დღეს, 13 მარტს დილით მივიდა. თუმცა, მის გამოჩენას სკოლაში პროტესტი მოჰყვა. მოსწავლეებმა ტრანსფარანტებით ხელში შესვენებაზე აქცია გამართეს. მოსწავლეები და პედაგოგები სკოლაში დირექტორის მოვალეობის შემსრულებლად ნანა დათაშვილის დარჩენას ითხოვენ, რომელიც ამ პოსტზე თითქმის ერთი წელია, სკოლიდან ყოფილი დირექტორის, ჟენია მერაბიშვილის წასვლის შემდეგ მუშაობს. ახალციხის საგანამანათლებლო რესურსცენტრი დილიდან ცდილობდა სკოლაში ვითარების განმუხტვას, თუმცა, სკოლის პედკოლექტივსა და რესურსცენტრს შორის მოლაპარაკება ვერ შედგა. მოლაპარაკება ვერც ინგა ვარდიძესა და სკოლის პედკოლექტივს შორის შედგა.

[თინათინ ზაზაძე, თამარ თოთაძე, ახალციხე]