დამეწყრილი აწყურის პრობლემამ ომბუდსმენამდე მიაღწია

დაზარალებულ მოსახლეობასთან შეხვედრა აწყურში, საკრებულოს შენობაში გაიმართა. აწყურის ტერიტორიული ორგანოს რწმუნებული შუქრი გოგოლაძე გვიხსნის, რომ სახალხო დამცველის აპარატის წარმომადგენლებს მოსახლეობის მოთხოვნები აინტერესებდათ.

შეგახსენებთ, რომ დამეწყრილ აწყურში მცხოვრებლები კომპენსაციას ან ისევ ახალციხის მუნიციპალიტეტის რომელიმე სოფელში დასახლებას ითხოვენ და კატეგორიულ უარს აცხადებენ სხვა კუთხეში გადასახლებაზე.

„უკიდურეს შემთხვევაში თანახმა არიან სამხედრო ნაწილის შენობაში შესახლებაზე. დაგვპირდნენ, რომ ლტოლვილთა სამინისტროსთან გვიშუამდგომლებენ", - ამბობს შუქრი გოგოლაძე

გასულ კვირას დამეწყრილ აწყურში მცხოვრები ოჯახების ბედით ლტოლვილთა სამინისტროც დაინტერესდა. პრობლემის მოგვარებაში ჩართულია რეგიონული განვითარების სამინისტროც.

შეგახსენებთ, რომ ახალციხის მუნიციპალიტეტის სოფელ აწყურში მეწყერის შედეგად რვა ოჯახი უსახლკაროდაა დარჩენილი. 2012 წლის ოქტრომრიდან ისინი ნაქირავებ სახლებში ცხოვრობენ, ბინის ქირას კი მუნიციპალიტეტი ადგილობრივი ბიუჯეტიდან უხდის.

ახალციხის მუნიციპალიტეტის გამგებლის მოვალოების შემსრულებელი ბესიკ ბლიაძე განმარტავს, რომ თითოეული ოჯახი ყოველთვიურად 150 ლარს იღებს. მისივე თქმით, ვიდრე მათი საკითხი არ გადაწყდება, ადგილობრივი ბიუჯეტიდან დაფინანსება არ შეწყდება.

[თამარ თოთაძე, ახალციხე]