დამეწყრილ აწყურში უსახლკაროდ დარჩენილები გადასახლებაზე უარს აცხადებენ

ახალციხის მუნიციპალიტეტის სოფელ აწყურში მეწყერის შედეგად დაზარალებული ოჯახების ბედით ამჯერად ლტოლვილთა სამინისტრო დაინტერესდა.

მეწყერის შედეგად დაზარალებულ რვა ოჯახს დღეს, 21 თებერვალს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს შიდა ქართლისა და სამცხე-ჯავახეთის ტერიტორიული ორგანოს წარმომდგენლები შეხვდნენ.

სამინისტრო დაზარალებულებს საქართველოს სხვა რეგიონებში გადასახლებას სთავაზობს, თუმცა, როგორც შეხვედრაზე მოსახლეობამ განაცხადა, ამ შეთავაზებას არ დასთანხმდებიან. დაზარალებულები ითხოვენ კომპენსაცია მიიღონ, ან საცხოვრებელი ფართით დაკმაყოფილდნენ, თუმცა ბინები ამავე სოფელში ან მუნიციპალიტეტში უნდა იყოს.

„სამინისტროს ბინები საქართველოს სხვადასხვა რეგიონებში აქვს შეძენილი, ჩვენ შევთავაზეთ ეს ბინები, მაგრამ მოსახლეობა სხვაგან გადასახლებაზე უარს ამბობს. მათი მოთხოვნაა, რომ სამინისტრომ ადგილზე შეისყიდოს ბინები და გადავცეთ მათ საკუთრებაში“, - ამბობს საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს შიდა ქართლისა და სამცხე-ჯავახეთის ტერიტორიული ორგანოს ხელმძღვანელი თამაზ გვიმრაძე.

მისივე თქმით, არსებობს მეორე ალტერნატივაც. აწყურში, ყოფილი სამხედრო ნაწილის შენობა გარემონტდეს და დაზარალებული მოსახლოება აღნიშნულ შენობაში შეასახლონ.

„ჩვენ გვინდა, რომ კომპენსაცია მოგვცენ, მაგრამ თუ ეს არ იქნება, მაშინ თანახმა ვართ, რომ სამხედრო შენობაში შევიდეთ“, - ამბობს მეწყერის შედეგად დაზარალებული ივანე ლაბაძე.

თამაზ გვიმრაძის თქმით, დაზარალებული მოსახლოების მოთხოვნებს სამინისტროს გააცნობენ. რას გადაწყვეტს სამინისტრო ცნობილი მოგვიანებით გახდება.

შეგახსენებთ, რომ ახალციხის მუნიციპალიტეტის სოფელ აწყურში მეწყერის შედეგად რვა ოჯახი უსახლკაროდაა დარჩენილი. 2012 წლის ოქტრომრიდან ისინი ნაქირავებ სახლებში ცხოვრობენ, ბინის ქირას კი მუნიციპალიტეტი ადგილობრივი ბიუჯეტიდან უხდის.

ახალციხის მუნიციპალიტეტის გამგებლის მოვალოების შემსრულებელი ბესიკ ბლიაძე განმარტავს, რომ თითოეული ოჯახი ყოველთვიურად 150 ლარს იღებს. მისივე თქმით, ვიდრე მათი საკითხი არ გადაწყდება, ადგილობრივი ბიუჯეტიდან დაფინანსება არ შეწყდება.

შეხვედრის შემდეგ, სამინისტროს წარმომადგენლები, აწყურში, დაზიანებული სახლების დასათვალიერებლად გაემგზავრნენ.


[თამარ თოთაძე, ახალციხე]