დამეწყრილი აწყურის პრობლემით რეგიონული განვითარების სამინისტრო ინტერესდება

ამ საკითზე 22 თებერვალს სამცხე-ჯავახეთის სამხარეო ადმინისტრაციაში გამართულ შეხვედრაზე იმსჯელეს.

შერგელაშვილის თქმით, მსგავსი პრობლემა საქართველოს არაერთ სოფელშია. რეგიონული განვითარების სამინისტროს ბიუჯეტი უკვე გაწერილია, თუმცა, არსებობს სარეზერვო ფონდები, საიდანაც თანხების გამოყოფა შესაძლებელია.

’’საჭიროა მოგვაწოდონ დაწვრილებითი ინფორმაცია სამინისტროში. ჩვენ ვუშუამდგომლებთ, რომ რაც შეიძლება სწრაფად მოხდეს რეაგირება’’ , - განაცხადა საქართველოს რეგიონული განვითარებისა და ინფრასტრუქტურის მინისტრის პირველმა მოადგილემ თენგიზ შერგელაშვილმა.

შეგახსენებთ, რომ რეგიონული განვითარების სამინისტროს წარმომადგენლებმა 22 თებერვალს სამცხე-ჯავახეთის სამხარეო ადმინისტრაციაში მორიგი სამუშაო შეხვედრა გამართეს. მათთან შეხვედრას ცდილობდნენ დამეწყრილი აწყურის მცხოვრებლებიც, თუმცა შეხვედრა ვერ მოხერხდა.

’’მაისის შემდეგ ქირით ვცხოვრობთ. რვა სული ვართ სახლში, თუ რამის წაღება შეიძლებოდა სახლიდან, ყველაფერი მოგვპარეს. სახელმწიფომ მხოლოდ სამი თვის ქირა გადაგვიხადა. ბოსელიც დაგვენგრა და პირუტყვი გაგვიცივდა. მოვითხოვთ, რაც შეიძლება დროულად დაგვეხმარონ’’, - გვითხრა დაზარალებულმა მარინა თაბაგარმა.
ახალციხის მუნიციპალიტეტის გამგებელის დროებით მოვალეობის შემსრულებელმა ბესიკ ხითარიშვილმა განაცხადა, რომ ვიდრე საკითხი საბოლოოდ მოგვარდება, დროებით ქირით გასულ ოჯახებს ქირას ადგილობრივი ხელისუფლება გადაუხდის.

’’გაწყვეტილება ერთია, პრობლემა უნდა მოგვარდეს! კონკრეტული ადამიანები დაკმაყოფილებულები იქნებიან საცხოვრებელი ფართით. მანამდე ყველა ოჯახი იქნება ბინით უზრუნველყოფილი და მათ ქირას მუნიციპალიტეტის გამგეობა დაფარავს’’, - განაცხადა ხითარიშვილმა.

დაზარალებული მოსახლეობა საცხოვრებელ ფართს და მიწის ნაკვეთებს იმ ფართის მუხედვით მიიღებს, რაც ოფიციალურად, კანონიერად ეკუთვნის.

[თინათინ ზაზაძე, ახალციხე]