აწყურის დამეწყრილ ოჯახებს გასული სამი თვის ქირას არ გადაუხდიან

ახალციხის მუნიციპალიტეტის სოფელ აწყურში რვა ოჯახი მეწყერის შედეგად უსახლკაროდაა დარჩენილი. გასული წლის ოქტომბრიდან ისინი ნაქირავებ სახლებში ცხოვრობენ. ადგილობრივმა ხელისუფლებამ მათ მხოლოდ სამი თვის ქირა (ოქტომბერი, ნოემბერი, დეკემბერი) გაუხადა. მას შემდეგ კი მოსახლეობა დახმარებას დღემდე ელოდება.

ახალციხის მუნიციპალიტეტის გამგეობაში განმარტავენ, რომ მიმდინარე წლის იანვრის, თებერვლისა და მარტის ბინის ქირას ამ ეტაპზე ვერ გადაუხდიან. გამგებლის მოვალეობის შემსრულებლის ბესიკ ბლიაძის თქმით, მეწყერის შედეგად დაზარალებულ მოსახლეობას აპრილის, მაისისა და ივნისის ქირას გადაუხდიან.

”ეს ისეთი პროცედურაა, რომ დრო სჭირდება. აპრილის თვის ქირას ყველას გადავუხდით. დაზარალებულმა მოსახლეობამ შესაბამისი აქტი უნდა წარმოადგინოს, რომ ნამდვილად ნაქირავებ ბინაში ცხოვრობს, ამას ბინის მესაკუთრეები შეადგენენ და დაახლოებით მაისის შუა რიცხვებამდე ყველა დაზარალებული მიიღებს ბინის ქირას”, - განმარტავს ბესიკ ბლიაძე.

მისივე თქმით, დაზარალებულები ბინის ქირას 150 ლარის ოდენობით მიიღებენ და გამგეობა სამთვიან ხელშეკრულებას დაუდებს. რა ბედი ეწევა სამი თვის შემდეგ აწყურში მცხოვრებ დაზარალებულ მოსახლეობას, ბესიკ ბლიაძე ვერ აკონკრეტებს.

”ამ საკითხზე სამინისტროსთან ვმუშაობთ. გვაქვს შემოთავაზება, რომ ზარალის ოდენობა დავადგინოთ, მოვიწვიოთ აუდიტი და ჩატარდეს ექსპერტიზა, თუ რა ქონებაზეა საუბარი. ხოლო, როცა ზარალი დაითვლება, სამინისტრო გადაწყვეტს როგორ უნდა მოიქცეს. ჩვენ ჩვენ საქმეს ვასრულებთ, შესაბამისად თუ არ მოესწრო ამ ხალხის დაკმაყოფილება ამ სამ თვეში, მაშინ გავაგრძელებთ ბინის ქირის გადახდას”, - ამბობს ბესიკ ბლიაძე.

[თამარ თოთაძე, ახალციხე]