აწყურში მეწყერისგან დაზარალებულები კონპენსაციას მიიღებენ

ახალციხის მუნიციპალიტეტის გამგეობაში აცხადებენ, რომ დამეწყრილი ოჯახების პრობლემას საბოლოოდ მოაგვარებენ. 12 დაზარალებული ოჯახი, ფულად კომპენსაციას მიიღებს. აწყურის ტერიტორიული ორგანოს რწმუნებულის თქმით, დაზარალებულმა მოსახლეობამ ალტერნატიული ფართის ნაცვლად, თანხის მიღება თავად გადაწყვიტა.

- ”ძალიან რთული სიტუაციაა, სპეციალისტებთან ერთად გასულ ოთხშაბათს ვიყავით და ჩვენს იქ ყოფნაში კედლებს ბზარები ემატებოდა. დაზარალებულებისთვის განიხილებოდა ალტერნატიული ფართი, აწყურში მდებარე ყოფილი სასაზღვრო ნაწილის შენობაში, თუმცა მოსახლეობამ თანხის მიღება არჩია”,- ამბობს შუქრი გოგოლაძე.

ადგილობრივ მუნიციპალიტეტში ამბობენ, რომ პრობლემის მოსაგვარებლად რეალური ნაბიჯების გადადმა აუცილებელია.

- ”ეს პრობლემა დიდი ხანია დგას, რატომღაც წინა ხელისუფლებამ გადაწყვიტა მიეცა ქირის ფული და დროებით, სადღაც შეესახლებინა. ჩვენ კატეგორიული წინააღმდეგები ვართ. ჯობია პრობლემა ერთხელ და სამუდამოდ მოგვარდეს და ამ ხალხზე გაიცეს კომპენსაციები, რათა შეძლონ ალტერნეტიული ფართის შეძენა”,- გვითხრა ახალციხის მუნიციპალიტეტის გამგებელმა ბესიკ ხითარიშვილმა.

მისი თქმით, კომპენსაცია იმ ოდენობით გაიცემა, რომ დაზარალებულებმა მუნიციპალიტეტის მასშტაბით, თუნდაც აწყურში შეძლონ საცხოვრებელი ფართის შეძენა.

[თინათინ ზაზაძე, ახალციხე]