დამეწყრილი აწყურის პრობლემით ”ერთსულოვნება” დაინტერესდა

ახალციხის მუნიციპალიტეტის სოფელ აწყურში რვა ოჯახი უსახლკაროდაა დარჩენილი. მეწყერის შედეგად დაზარალებული მოსახლეობა უკვე წლებია დახმარებას ითხოვს. თუმცა, გარდა სამი თვის ქირის ფულისა, რომელიც ახალციხის მუნიციპალიტეტის გამგეობამ გასულ წელს გადაუხადა, მათ არანაირი დახმარება არ მიუღიათ. დაზარალებული მოსახლეობა ითხოვეს, რომ მათი პრობლემით ცენტრალური ხელისუფლება დაინტერესდეს.

გაღმა აწყურში მცხოვრებმა მოსახლეობამ ადგილობრივ ხელისუფლებას არაერთხელ მიმართა. ახალციხის მუნიციპალიტეტის მაჟორიტარი დეპუტატი ”ნაციონალური მოძრაობიდან, პარლამენტის წევრი, ვაჟა ჩიტაშვილი დაზარალებულ მოსახლეობას რამდენჯერმე შეხვდა და დახმარებას დაჰპირდა. დამეწყრილი აწყურის პრობლემით რეგიონული განვითარების სამინისტროც დაინტერესდა. თუმცა, პრობლემა დღემდე მოუგვარებელია. ადგილობრივების თქმით, ბზარები დღითიდღე იზრდება და აქ ცხოვრება საშიშია.

დამეწყრილი აწყურის მოსახლეობამ ახლა არასამთავრობო ორგანიზაციას ”ერთსულოვნება საზოგადოების უფლებებისათვის” განცხადებით მიმართა. სადაც დამეწყრილ ზონაში არსებული მდგომარეობაა აღწერილი და ნათქვამია, რომ აღნიშნულის შესახებ ადგილობრივ თვითმმართველობას, კერძოდ კი ყოფილ გამგებელს გელა დემეტრაძეს რამდენჯერმე მიმართეს.

”დემეტრაძემ წერილობით გვიპასუხა, სადაც გვატყობინებს, რომ ”ამ ეტაპზე შეუძლებელია ჩვენი განცხადების დაკმაყოფილება”. გამგეობამ, კერძოდ კი გ. დემეტრაძემ 2012 წლის 30 ივლისს ისევ წერილობით გვაცნობა, რომ საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროს მიერ შემოთავაზებულ იქნა ნინოწმინდის მუნიციპალიტეტში და კახეთის რეგიონში შესყიდული საცხოვრებელი სახლები. შემოთავაზება შემოთავაზებად დარჩა თეთრ ფურცელზე”, - ნათქვამია განცხადებაში.

ადგილობრივი მოსახლეობის მოთხოვნაა, რომ ”მთავრობამ შესაბამისი კომისია გამოყოს, დანიშნონ აუდიტი და საერთოდ, მოგვაქციონ ყურადღება”.

განცხადებაში, რომელიც არასამთავრობო ორგანიზაციის ხელმძღვანელობის სახელზე მომზადდა ნათქვამია, რომ დამეწყრილი აწურის მოსახლეობა ”ერთსულოვნებისგან” მოითხოვს, რომ აწარმოოს მონიტორინგი ყველა სამთავრობო და არასამთავრობო ორგანოებში. განცხადებას ხელს მეწყერის შედეგად დაზარალებული მოსახლეობა აწერს.

არასამთავრობო ორგანიზაციის წარმომადგენლების თქმით, მათ ყველა ის დოკუმენტაცია მოაგროვეს, რაც წლების განმავლობაში აწყურის მოსახლეობამ აღნიშნულ საკითხთან დაკავშირებით მიიღო. ახლა კი მისი შესწავლა მიმდინარეობს. მათი მიზანია, რომ აღნიშნული პრობლემის შესახებ ინფორმაცია ცენტრალურ ხელისუფლებამდე მივიდეს.

აღნიშნულთან დაკავშირებით ”სამხრეთის კარიბჭე” მუშაობას განაგრძობს.



[თამარ თოთაძე, ახალციხე]