აწყურის უსახლკარო ოჯახებს ახალციხის თვითმმართველობამ ქირა დაუფარა

აწყურის მკვიდრს ნონა თაბაგარს, რომელიც მეწყერის გამო სოფელში სახლის დანგრევის შემდეგ, ახალციხეში, გრიგოლ ორბელიანის N7-ში ცხოვრობს, ადგილობრივ თვითმმართველობამ ბინის ქირის გადასახადი უკვე დაუფარა.

თაბაგარი ადგილობრივ თვითმმართველობას ბინის საფასურის გადახდის მოთხოვნით დაახლოებით ერთი თვის განმავლობაში აკითხავდა: „2 თვის გადაგვიხადეს უკვე და გვითხრეს, რომ ამის შემდეგ გადასახადი აღარ დაიგვიანებს“.

ადგილობრივი ბიუჯეტიდან აწყურში დამეწყრილი ოჯახებისთვის 2 თვის ბინის ქირა 14 მარტს გადარიცხეს.

შეგახსენებთ, რომ ახალციხის მუნიციპალიტეტის გამგეობა ქირას აწყურში 7 დაზარალებულ ოჯახს უხდის. ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე აცხადებს, რომ თვითმმართველობა ამ თანხას მანამდე გადაიხდის, ვიდრე სახელმწიფო დაზარალებულებისთვის რაიმე ალტერნატივას არ გამონახავს.

[თამუნა უჩიძე, ახალციხე]