ადიგენის ყოფილი გამგებლის „საქმის ავტორის“ ორსაათიანი დაკითხვა

დღეს, 28 იანვარს ადიგენის მუნიციპალიტეტის გამგებლის სიმონ პარუნაშვილის მორიგი სასამართლო პროცესი, 3 საათის განმავლობაში მიმდინარეობდა. აქედან 2 საათი ერთი მოწმის, საქართველოს ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე–ჯავახეთის სამმართველოს გამომძიებლის გიორგი გვარამაძის დაკითხვას დაეთმო.



თუმცა, მანამდე, სასამართლო პროცესი დაცვის მხარის პროტესტით დაიწყო. მათ სასამართლო დარბაზში ბრალდების მხარის მიერ მტკიცებულებების ელექტორნული ფორმით წარმოდგენის მცდელობა გააპროტესტეს. გამომძიებელს, რომელიც დაკითხვაზე შემოვიდოდა, მონიტორზე, ინტერნეტში უნდა ეჩვენებინა ის შეუსაბამობა, რომელიც სადავო ტენდერებს ეხებოდა. თუმცა, იმის გამო, რომ მტკიცებულებათა ნუსხაში აღნიშნული მტკიცებულება ელექტორნული ფორმით არ იყო წარმოდგენილი, მისი გამოყენების საშუალება მოწმის სახით დაკითხულ გამომძიებელს პროცესზე არ მიეცა.

მანამდე ვიდრე გამომძიებლის დაკითხვას დაიწყებდნენ, ჩვენება შპს „ადიგენი 2009“-ის დირექტორმა ზაზა გიგოლაშვილმა მისცა. პროკურატურა ბრალდებულებს სწორედ „ადიგენი 2009“-სთან ინტერესთა კონფლიქტის გამო ედავება. აღნიშნული ფირმა ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილი მთავარი სპეციალისტის და მაშინ სატენდერო კომისიის ერთ-ერთი წევრის გელა აღლემაშვილის იყო.

გიგოლაშვილმა იმ შესრულებული სამუშაოების ნუსხა ჩაიკითხა, რომლებიც მისმა კომპანიამ განახორციელა. მოწმის თქმით, მას გელა აღლემაშვილი სამუშაოების შესრულებაში ხშირად ეხმარებოდა, თუმცა, აღლემაშვილმა ფირმა 2013 წლის იანვარში გაასხვისა და ახლა მისი 100%-იანი წილის მფლობელი აღარაა.

„როგორც წინასწარ გამოძიებაში გიგოლაშვილმა განაცხადა, მას აღლემაშვილი ეუბნებოდა, რომ ტენდერი იყო გამოცხადებული და მონაწილეობა მიეღო“, - ეს უკვე სასამართლო დარბაზში დაკითხვისას პარუნაშვილის საქმის გამომძიებელმა გიორგი გვარამაძემ განაცხადა.



თუმცა, მან თავი აარიდა დაცვის მხარის მიერ სადავო ტენდერებთან დაკავშირებით დასმულ კითხვებს: რამდენ ლარზე იყო გამოცხადებული ტენდერი? კრძალავს კანონი, რომ პრეტენდენტმა დოკუმენტებში შესწორება შეიტანოს? სპარტაკ მაჭარაშვილის მიერ დოკუმენტებში შეტანილი ცვლილების შესახებ იცოდა თუ არა ვინმემ? თანხა მეტი ჩაერიცხა თუ ნაკლები, ფირმას რომელმაც სამუშაო განახორციელა? მიადგა თუ არა ვინმეს ზიანი? დაიკითხნენ თუ არა დაზარალებულები? იცით თუ არა, რა დანაშაული აქვს ჩადენილი სიმონ პარუნაშვილს?

„გამომძიებელს კითხავთ, როგორც პროკურორს“, - გააპროტესტა დაცვის მხარის შეკითხვები პროკურორმა რევაზ მამადაშვილმა.

ამ შუამდგომლობას სირცხვილი უწოდა სიმონ პარუნაშვილის ადვოკატმა გიორგი გელხაურმა: „გამომძიებელს ვკითხავთ თუ მუშას?! იქნებ საგამოძიებო მოქმედებებს სხვა ატარებდა და ხელს ეს აწერდა?!“

არ გაიზიარა პროკურორის პროტესტი მოსამართლე გიორგი ლონდარიძემ: „ეს არ არის უბრალო მოწმე, ის საქმის ავტორია“.

გელხაურმა დაკითხვა გააგრძელა: „აგვიხსენით,რაში მდგომარეობს პარუნაშვილის მიერ ჩადენილი დანაშაული“.

„თქვენ უკვე გადმოგეცათ ეს საქმე“, - უპასუხა გვარამაძემ.

„ბატონო მოსამართლე, ეს მოწმე გვებლატავება! გთხოვთ, მიუთითოთ გვიპასუხოს შეკითხვებზე“ - მიმართა გელხაურმა მოსამართლეს და დაამატა, რომ საქმე მოწმის არაკომპეტენტურობასთან გვაქვს.

„რა არის ინტერესთა კონფლიქტი?“ - ჰკითხა ისევ ადვოკატმა მოწმეს.

„არც ამ კითხვაზე გიპასუხებთ, რადგან ეს ჩემი ცოდნის შემოწმებას გულისხმობს“, - განაცხადა გამომძიებელმა.

„კი, თქვენ ცოდნას ვამოწმებთ“, - უთხრა გელხაურმა და ასევე დაინტერესდა, რამდენი წელია რაც გვარამაძე გამომძიებლად მუშაობს და აქვს თუ არა იურისტის განათლება.

რაზეც გვარამაძემ უპასუხა, რომ 2 წელია გამომძიებლად მუშაობს, უმაღლესი განათლება აქვს და პროფესიით იურისტია.

„ეს სასამართლო პროცესია თუ კინო ჩვენება „ათას ერთი ღამიდან?!“ თქვენ ვალდებული ხართ ყველა კითხვას უპასუხოთ!“ - ვერ დაფარა აღშფოთება ადიგენის მუნიციპალიტეტის ყოფილი გამგებლისა და ერთ-ერთი ბრალდებულის რატი ტატალაშვილის ადვოკატმა ივანე ტატალაშვილმა. თუმცა, მოწმემ მის მიერ დასმული კითხვების ნაწილსაც თავი აარიდა.

დაცვის მხარის შეკთხვებისგან განსხვავებით, გამომძიებელმა პროკურორის ყველა კითხვას უპასუხა. მისი თქმით, სახელმწიფოს 4,729 ლარის ზარალი მიადგა, ახსნა რას გულისხმობს ინტერესთა კონფლიქტი და რა დანაშაული ჩაიდინეს გამგეობის თანამშრომლებმა.

რა შემთხვევაში შეიძლება თქვას უარი პროკურატურამ ბრალდებაზე?

სასამართლო პროცესის დასრულების შემდეგ, როგორც დაცვის მხარის წარმომადგენლებმა განაცხადეს, იმ შემთხვევაში თუ სიმონ პარუნაშვილი ადიგენის მუნიციპალიტეტის გამგებლობაზე უარს იტყვის, უარს იტყვის ბრალდებაზე პროკურატურაც.

„აქ ნათურები და ბოძები არაფერ შუაშია. არაერთხელ სთხოვეს სიმონს, რომ მათთვის სასურველი პოლიტიკური ნაბიჯი გადაედგა, რაც იმას გულისხმობს, რომ ადიგენში უნდა იყოს გამგებელი „ოცნებიდან“ და არა "ნაციონალებიდან“, - გვთხრა საპარლამენტო უმცირესობის წარმომადგენელმა დავით დარჩიაშვილმა, რომელიც პარუნაშვილის პროცესს ესწრებოდა.

პარუნაშვილის თქმით, იგი ბრალს, რომელიც არ ჩაუდენია, ვერ აღიარებს, გამართლების შემთხვევაში კი გამგებლად აუცილებლად დაბრუნდება.

სხვა გეგმები აქვს მის ყოფილ მოადგილეს, ასევე, ერთ-ერთ ბრალდებულს რატი ტატალაშვილს: „საზღვარგარეთ ვაპირებ წასვლას“.

მომავალი სასამართლო პროცესი 12 თებერვალს 13:00 საათზე ჩაინიშნა. პროკურორის განცხადებით, დარჩენილი 10 მოწმიდან შესაძლია 3 მოიხსნას.

შეგახსენებთ, სიმონ პარუნაშვილი მიმდინარე წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა. მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძეს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილსა და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს. სიმონ პარუნაშვილის გარდა, დანაშაულს ყველა ბრალდებული აღიარებს.

[თამუნა უჩიძე, ახალციხე]