დღეს, 12 თებერვალს, ადიგენის მუნიციპალიტეტის ყოფილი გამგებლის სიმონ პარუნაშვილის სასამართლო პროცესზე ხუთი მოწმე, ერთი ექსპერტი და ოთხი მუშა დაიკითხა. თუმცა, მანამდე სანამ პირველ მოწმეს დარბაზში გამოიძახებდნენ, პროკურორმა რევაზ მამადაშვილმა მოწმეების ამორიცხვის შესახებ განაცხადა. მისი თქმით, ბრალდების მხარემ რვა დასაკითხი მოწმე შეკვეცა.
პირველი ინჟინერ-ექსპერტი უჩა ხაჩიური დაიკითხა. მან შპს „ნამქერის“ მიერ სოფელ ბოლაჯურში გაკეთებული გარე განათების შესახებ დასკვნა დაწერა. მისი თქმით, საინჟინრო ექსპერტიზის თანახმად, სატენდერო ხარჯთაღრიცხვასა და ფორმა 2-ის მონაცემებს შორის სხვაობა 4,729 ლარი იყო.
დაცვის მხარის კითხვაზე - ტენდერში პრეტენდენტმა ნაკლები თანხით გაიმარჯვა და არც გადარიცხვისას ჩაურიცხავს მისთვის გამგეობას მეტი, ამიტომ, საინტერესოა, რა ზიანი მიადგა სახელმწიფო ბიუჯეტს, ხაჩიურმა უპასუხა: „ეს ჩემი კომპეტენცია არაა, სუბიექტური აზრის დაფიქსირებისგან კი თავს შევიკავებ“.
ხაჩიურის შემდეგ დარბაზში მუშები დაიკითხნენ. სტეფანე გაბოშვილმა, პროკურორის დასმულ კითხვაზე, ბოლაჯურში დასაყენებელი გარე განათების ბოძები შპს „ნამქერმა“ საიდან მოიტანა, უპასუხა, რომ თბილისიდან. მისივე თქმით, ყველა ბოძი ახალი იყო.
„თუ თანახმა იქნებით, წინასწარ გამოძიებაში თქვენ მიცემულ ჩვენებას წავიკითხავ“, - მიმართა მოწმეს პროკურორმა, თუმცა მოწმის თანხმობის მიღების შემდეგ, ჩვენების გამოქვეყნება გადაიფიქრა და თქვა: „გამოქვეყნებისგან თავს შევიკავებ, მოგვიანებით შევხვდებით“.
დაცვის მხარემ, პროკურორის განცხადებას მუქარა უწოდა, პროკურორმა კი ღიმილით უპასუხა: „პატივი გეცით, არ გამოვაქვეყნე“.
მესამე მოწმემ, მუშა ზურაბ გაბუნიამ განაცხადა, რომ იგი შპს „ნამქერის“ ხელმძღვანელის ანტონ მერაბიშვილის დავალებით მილებს „აღობილიდან“, გზიდან იღებდა, თუმცა, შემდეგ რაში იყენებდნენ ამ მილებს, არ იცის.
„მილებს სპეციალური არხიდან ვიღებდით, სხვადასხვა ზომებად ვჭრიდით, ურალზე ვტვირთავდით ხელით. ამ მილებს გარე განათებისთვის იყენებდნენ“, - განაცხადა სასამართლო დარბაზში მეოთხე მოწმემ ავთანდილ მამულაშვილმა და დაამატა, რომ ეს მილები მას სწორედ ბოლაჯურში გაატანეს.
მისივე თქმით, ძველი ბოძები უკეთესი ხარისხისაა: „სქელი და გამძლეა, ახლები ქაღალდის ფურცელივითაა“.
მილებს რომ სპეციალური თხრილიდან იღებდა, ეს სასამართლო დარბაზში მეხუთე მოწმემ, მუშამ ვაჟა აბუალძემაც დაადასტურა: „ამ ტრუბებით განათების ბოძებს ვამზადებდით“.
დღევანდელ პროცესზე ბრალდების მხარის მოწმეების დაკთხვა დასრულდა. მომავალ პროცესზე წერილობით მტკიცებულებებს გამოიკვლევენ, შემდეგ კი მხარეები დასკვნით სიტყვას წაიკითხავენ.
მომავალი სასამართლო პროცესი 19 თებერვალს 15: 00 საათზე ჩაინიშნა.
შეგახსენებთ, სიმონ პარუნაშვილი მიმდინარე წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ
დააკავა. მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძეს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილსა და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს. სიმონ პარუნაშვილის გარდა, დანაშაულს
ყველა ბრალდებული აღიარებს.
[თამუნა უჩიძე, ახალციხე]