ადიგენის გამგებლის საქმეს ერთი ბრალდებული გამოაკლდა

ადიგენის ყოფილი გამგებლის სიმონ პარუნაშვილის მორიგი სასამართლო პროცესი ბრალდების მხარის შუამდგომლობების წარდგენით დაიწყო. პირველი შუამდგომლობა, ერთ-ერთ ბრალდებულს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილს ეხებოდა.

„აღლემაშვილმა ითანამშრომლა გამოძიებასთან, ამიტომ ბრალდების მხარე სარგებლობს დისკრეციის უფლებით და ითხოვს მის განრიდებას“, - განაცხადა სასამართლო პროცესზე პროკურორმა რევაზ მამარდაშვილმა.

მოსამართლე გიორგი ლონდარძემ მამარდაშვილის შუამდგომლობა დააკმაყოფილა: „მიმდინარე სისხლის სამართლის საქმეს გამოეყოფა აღლემაშვილის საქმე და ის სასამართლოს დასამტკიცებლად ცალკე დაუბრუნდება. მიღებული გადაწყვეტილება აღარ გასაჩივრდება“.

აღლემაშვილს ეხებოდა მეორე შუამდგომლობაც. მამარდაშვილმა მომავალ პროცესზე აღლემაშვილის მოწმის სახით დაკითხვა ითხოვა.

„ბოლო პროცესზე მოწმე სპარტაკ მაჭარაშვილმა დაკთხვისას განაცხადა, რომ ის ეხმარებოდა ანტომ მერაბშივილს (ვინც ტენდერში მოგებული სამუშაო შეასრულა) სატენდერო დოკუმენტაციის შეცვლაში. სწორედ გელა აღლემაშვილის მეშვეობით გადასცა ანტონ მერაბიშვილს სპარტაკ მაჭარაშვილმა დოკუმენტები. ამიტომ ახალი გარემოებები გამოიკვეთა და მომეცით ნება, რომ მომავალ პროცესზე აღლემაშვილი დავკითხოთ“, - განაცხადა პროკურორმა.

მას დაეთანხმნენ აღლემაშვილი და მისი ადვოკატი ირაკლი ბარძიმაძეც.

„მაჭარაშვილის დაკითხვისას გამოიკვეთა უზუსტობები და გვინდა ამ ყველაფერს ნათელი მოვფინოთ“, - მიმართა მოსამართლეს ბარძიმაძემაც, თუმცა მას კოლეგები არ დაეთანხმნენ.

სიმონ პარუნაშვილის ადვოკატის გიორგი გელხაურისთვის გაუგებარია, თუ გელა აღლემაშვილის მიმართ განრიდება გაფორმდება, მაშინ რა ფორმით უნდა დაიკითხოს იგი. მისივე თქმით, თუ რიგი საკითხები სპარტაკ მაჭარაშვილის ჩვენების გამო ისევ ბუნდოვანი რჩება, მაშინ გაირკვეს ყველაფერი და ბრლადებამ ამის შემდეგ გაიხმოს აღლემაშვილის საქმე სასამართლოდან: „ეს შუამდგომლობა სასამართლომ წინა პროცესზე არ დააკმაყოფილა და ახლა რისი იმედი აქვს პროკურორს, იგივე შუამდგომლობას რომ აყენებს, არ ვიცი“.

გელხაურს დაეთნხმნენ სხვა ადვოკატებიც.

პროკურორი კი კვლავ საკუთარი პოზიციის დაცვას შეეცადა: „მე საქმეში მაინც მაქვს ის ინფორმაცია, რაც აღლემაშვილს აქ უნდა ეთქვა. მაგრამ რადგან გავითვალისწინე ბრალდებულის და მისი ადვოკატის სურვილი მიაწოდონ ეს ინფორმაცია სასამართლოსაც, შუამდგომლობა ამიტომ დავაყენე“.

მხარეთა მოსაზრებების მოსმენის შემდეგ, მოსამართლემ განაცხადა, რომ ბრალდების მხარის შუამდგომლობა აღლემაშვილის მომავალ პროცესზე დაკითხვასთან დაკავშირებით, არ დაკმაყოფილდება.

„იგივე შუამდგომლობა, რომელზეც უკვე გადაწყვეტილებაა მიღებული სასამართლოში, იგივე სასამართლოში აღარ განიხილება“, - უპასუხა ლონდარიძემ მხარეებს და დარბაზში პირველი მოწმე გამოიძახა.

მისი დაკითხვის პროცესს გელა აღლემაშვილი და მისი ადვოკატიც დაესწრენ, თუმცა, მანამდე სანამ მეორე მოწმის დაკითხვას დაიწყებდნენ, გელა აღლემაშვილმა მოსამართლეს სასამართლოზე დაკითხვა სთხოვა: „გთხოვთ დამკითხეთ ბატონო მოსამართლე. ბევრი ბუნდოვანი საკითხია და ჩემი დაკითხვით ბევრი რამ გაიკრვევა“.

„მესმის თქვენი მოქალაქეობრივი პოზიცია, მაგრამ ამაზე უკვე იმსჯელა სასამართლომ“, - უპასუხა მოსამართლემ ბრალდებულს.
ამის შემდეგ ბრალდებულმაც და მისმა ადვოკატმაც სასამართლო დარბაზი დატოვეს.

„ცალკე რომ დაკითხავენ, უფრო ცუდი იქნება, ვიდრე აქ რომ დაიკითხებოდა“, - უთხრა ირაკლი ბარძიმაძემ ადვოკატებს და სასამართლო დარბაზიდან გავიდა.

სასამართლო პროცესის დასრულების შემდეგ „სამხრეთის კარიბჭე“ გელა აღლემაშვილს ტელეფონით დაუკავშირდა და კითხვაზე თუ რისი თქმა სურდა მას სასამართლოსთვის, გვიპასუხა: „ბევრი ახალი, გამოუცდელი კადრია, გაუგებრად საუბრობენ, ამიტომ ბუნდოვანი დარჩა რიგი საკითხი და მინდოდა ამ ყველაფრისთვის ნათელი მომეფინა, მაგრამ თუ სიტყვის თქმის საშუალება მომეცემოდა, სასამართლოში ვიტყოდი“, - გვთხრა და ტელეფონი გაგვითიშა.

შეგახსენებთ, ადიგენის მუნიციპალიტეტის ყოფილი გამგებელი სიმონ პარუნაშვილი მიმდინარე წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა. მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძეს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილს (რომელიც დღეიდან გამოაკლდა საქმეს) და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს

[თამუნა უჩიძე, ახალციხე]