ახალციხის სასამართლოში ადიგენის ყოფილი გამგებლის პროცესი მიმდინარეობს

სიმონ პარუნაშვილისა და მასთან ერთად ბრალდებულების რატი ტატალაშვილის, ჯემალ იაკობაძისა და გელა აღლემაშვილის წინა სასამართლო პროცესი 26 ნოემბერს გაიმართა. პროცესზე აღნიშნულ საქმეს ერთი ბრალდებული გამოაკლდა. ბრალდების მხარემ შუამდგომლობა დააყენა, რომელიც ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილს ეხებოდა.

„აღლემაშვილმა ითანამშრომლა გამოძიებასთან, ამიტომ ბრალდების მხარე სარგებლობს დისკრეციის უფლებით და ითხოვს მის განრიდებას“, - განაცხადა სასამართლო პროცესზე პროკურორმა რევაზ მამარდაშვილმა.

მოსამართლე გიორგი ლონდარძემ მამარდაშვილის შუამდგომლობა დააკმაყოფილა.

შეგახსენებთ, რომ ადიგენის მუნიციპალიტეტის ყოფილი გამგებელი სიმონ პარუნაშვილი მიმდინარე წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა. 29 აგვისტოს კი გირაოს, 3000 ლარის სანაცვლოდ გაათავისუფლეს.

მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძესა და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს.

[SKnews.ge]