გაგრძელდება თუ არა ბორჯომის პოლიციის ყოფილი უფროსის სასამართლო პროცესები

განაჩენის გამოცხადებიდან სასამართლოს გადაწყვეტილების გასაჩივრების ერთთვიანი ვადა სამცხე-ჯავახეთის საოლქო პროკურატურას 17 იანვარს ამოეწურება.

სამცხე-ჯავახეთის საოლქო პროკურატურაში პროკურორი მამუკა ქომოშვილი, რომელიც ხვედელიანის საქმეში მხოლოდ განაჩენის გამოცხადების დღეს, 17 დეკემბერს ჩაერთო, ამბობს, რომ ჯერ გადაწყვეტილება გასაჩივრების შესახებ მიღებული არ არის.

„ჯერ ვერაფერს გეტყვით, რადგან მაგ საკითხთან დაკავშირებით გადაწყვეტილება არ მიგვიღია“, - ამბობს ქომოშვილი.

ასევე უცნობია, მოითხოვს თუ არა მიყენებული ზიანის ანაზღაურებას სასამართლოს გზით თავად ხვედელიანი.

„ეს პირადად ხვედელიანის გადასაწყვეტია, ალბათ დრო სჭირდება ამას. იფიქრებს და როგორც მეტყვის, ისე მოვიქცევით, ჯერ-ჯერობით არაფერს აპირებს“, - აცხადებს მამუკა ხვედელიანის ადვოკატი ზაზა მირიდაშვილი.

შეგახსენებთ, რომ ბორჯომის პოლიციის ყოფილი უფროსი და ბორჯომის მჟორიტარი დეპუტატობის კანდიდატი „ნაციონალური მოძრაობიდან“ მამუკა ხვედელიანი, მის ყოფილ თანამშრომელბთან ერთად ბრალდებულნი იყვნენ, მამაკაცის სკამის ფეხით გაუპატიურებაში. მათ გამართლებას ახალციხის რაიონულ სასამართლოში საპროტესტო აქციები მოჰყვა. მოგვიანებით აღნიშნულ საქმეზე გამამართლებელი განაჩენი გამოიტანა თბილისის სააპელაციო სასამართლომაც.

{თამუნა უჩიძე, ახალციხე]