მამუკა ხვედელიანის საქმე უზენაეს სასამართლოში გაასაჩივრეს

თბილისიის სააპელაციო სასამართლოს გამამართლებელი გადაწყვეტილება სამცხე-ჯავახეთის საოლქო პროკურორმა მამუკა ქომოშვილმა უზენაეს სასამართლოში გაასაჩივრა.

„იანვარში შევიტანეთ სარჩელი, ვადაში ჩავეტიეთ“, - გვითხრა ქომოშვილმა.

დაცვის მხარემ საქმის უზენაეს სასამართლოში გასაჩივრების შესახებ „სამხრეთის კარიბჭესგან“ შეიტყო.

„ამის შესახებ ჯერ ჩვენთვის ცნობილი არ არის. ალბათ შეგვატყობინებენ, - ამბობს მამუკა ხვედელიანის ადვოკატი ზაზა მირიდაშვილი და ამატებს, - მეეჭვება ეს საქმე უზენაესმა სასამართლომ დასაშვებად ცნოს. იმდენად დასაბუთებული და კანონიერი გადაწყვეტილება აქვს მიღებული, როგორც პირველი, ასევე მეორე ინსტანციის სასამართლოს, რომ 90%-ით უზენაესში ამ საქმეს წარმოებაში არ მიიღებენ“.

მირიდაშვილს მიაჩნია, რომ იგივე მტკიცებულებებით ბრალდების მხარე საქმეში ვერაფერს შეცვლის: „გაასაჩივრეს იმიტომ, რომ უნდა გაესაჩივრებინათ, ანუ ვალდებულების გამო, თორემ როგორც მკვდარს, ისე ამ საქმეს, ვერაფერი ეშველება“.

მიუხედავად იმისა, რომ ხვედელიანისა და მისი ყოფილი თანამშრომლების საქმეზე როგორც ახალციხის რაიონულმა სასამართლომ, ასევე, თბილისიის სააპელაციომ გამამართლებელი განაჩენი გამოიტანეს, იმავე საქმეში ერთ-ერთ ეპიზოდში ბრალდებული ზ.ლ. ამ დრომდე პატიმრობაშია. მას ბრალდების მხარე ყალბი ჩანაწერის გაკეთებასა (სსკ-ის 341-ე მუხლი) და ურთიერთსაწინააღმდეგო ჩვენების მიცემას ( სსკ-ის 371-ე მუხლი) ედავება.

ზ.ლ-ს ადვოკატის ირაკლი ბარძიმაძის მტკიცებით, იგი ხვედელიანის გამო ჰყავთ დაკავებული და ხვედელიანის წინააღდეგ მოწმედ სჭირდებათ: „თუ გაასაჩივრეს, მაშინ ზ. ლ-ც იმიტომ ჰყავთ ციხეში, რომ იქნებ გადათქვას და ტყუილად დაადოს ხელი ხვედელიანს“.

შეგახსენებთ, ახალციხის რაიონულმა სასამართლომ, ბორჯომის პოლიციის ყოფილი უფროსი, "ერთიანი ნაციონალური მოძრაობის" მაჟორიტარი კანდიდატი, მამუკა ხვედელიანი უდანაშაულოდ სცნო და სასამართლო დარბაზიდან გაათავისუფლა. სასამართლოს განაჩენს ახალციხესა და ბორჯომში საპროტესტო აქციების ტალღა მოჰყვა.

[თამუნა უჩიძე, ახალციხე]