გოჩა ჯეირანაშვილი ხვედელიანის საქმეზე: ‘ნებისმიერ დროს იგივე გადაწყვეტილებას მივიღებდი'

პარლამენტის წევრს აინტერესებდა, როცა ჯეირანაშვილი პროკურატურაში საგამოძიებო ნაწილის უფროსი იყო იცნობდა თუ არა ბორჯომის პოლიციის მაშინდელ უფროსს მამუკა ხვედელიანს, რაზეც ჯეირანაშვილმა უპასუხა, რომ არ იცნობდა და მისი მხოლოდ სახელი და გვარი იცოდა.

ბორჯომის პოლიციის ყოფილი უფროსი, მამუკა ხვედელიანი და მისი ოთხი თანამშრომელი 2009 წლის პირველი იანვრის ღამეს მომხდარი დანაშაულის გამო დააკავეს. ბრალდების მხარის განცხადებით, მამაკაცის სკამის ფეხით გაუპატიურება, სწორედ ამ ღამეს მოხდა: ბაკურიანში ახალგაზრდებმა იჩხუბეს, ბორჯომის პოლიციის თანამშრომლებმა ბაკურიანიდან ჩამოყვანილი ბიჭები ოთახებში გადაანაწილეს და აღიარებითი ჩვენების მიცემა წამებით სცადეს.

ბაკურიანში მომხდარს სამცხე-ჯავახეთის სამხარეო მთავარი სამმართველო იძიებდა.

ბაკურიანში მომხდარ საქმეზე გამამართლებელი განაჩენი გოჩა ჯეირანაშვილმა ოთხი წლის შემდეგ 2013 წლის სამ ივლისს გამოიტანა. ხუთივე ბრალდებული, მათ შორის მამუკა ხვედელიანი დარბაზიდან გაათავისუფლა.

ხულორდავას კითხვაზე მიიღებდით თუ არა იგივე გადაწყვეტილებას 2012 წლის სამ ივლისს? ჯეირანაშვილმა უპასუხა, რომ ნებისმიერ დროს იგივე გადაწყვეტილებას მიიღებდა.

ამავე თემაზე: რა კავშირი ჰქონდა ჯეირანაშვილს ხვედელიანის საქმესთან?

[მარიამ ბარძიმაძე, ახალციხე]