რატომ ვერ დასრულდა ბორჯომის პოლიციის ყოფილი უფროსის საქმე?

ბორჯომის პოლიციის ყოფილი უფროსის მამუკა ხვედელიანის პროცესი 7 საათზე მეტ ხანს მიმდინარეობდა. ამ ხნის განმავლობაში ბრალდებისა და დაცვის მხარემ დასკვნითი სიტყვა წარმოთქვეს.

„რეპლიკა და ბრალდებულების საბოლოო სიტყვის მოსმენა ვეღარ მოვასწარით“, - გვითხრა მოსამართლემ გოჩა ჯეირანაშვილმა.
მომავალი პროცესი სწორედ ბრალდებულების საბოლოო სიტყვას დაეთმობა. ამავე პროცესზე გამოიტანს თუ არა სასამართლო განაჩენს, ჯერ უცნობია.

„ვერ გეტყვით რა იქნება“, - ამბობს ჯეირანაშვილი.

დღეს დახურული სასამრთლო პროცესი ხვედელიანის დასჯის მოთხოვნით მდუმარე აქციის ფონზე მიმდინარეობდა.

ხვედელიანი, 2012 წლის 30 ნოემბერს, სამცხე-ჯავახეთის საოლქო პროკურატურისა და შს მთავარი სამმართველოს თანამშრომლებმა, თბილისში დააკავეს. ხვედელიანი წლების განამვლობაში მუშაობდა ბორჯომის შს სამმართველოს უფროსის თანამდებობაზე. 2012 წლის საპარლამენტო არჩევნებში კი ”ნაციონალური მოძრაობიდან” ბორჯომის მაჟორიტარ დეპუტატად იყო წარდგენილი. ხვედელიანს ბრალი სისხლის სამართლის კოდექსის 144 /2 ა. ბ.ე, 143/ 3 ა, 333/ 3, ბ გ 147 / 1 და 148 მუხლებით ედება. მისი სასამართლო პროცესები მიმდინარე წლის თებერვლიდან მიმდინარეობს.

[თამუნა უჩიძე, ახალციხე]