ბორჯომის პოლიციის ყოფილი უფროსის მამუკა ხვედელიანისა და მართან ერთად ბრალდებული ოთხი პოლიციელის გათავისუფლება ახალციხის რაიონულ სასამართლოსთან დღეს, 11 ივლისს, კიდევ ერთხელ გააპროტესტეს. საინიციატივო ჯგუფის წევრების თქმით, აქცია გაცნობითი ხასიათის იყო.
„გვინდოდა მთელს საქართველოს გაეგო, რომ დაიწყო სამოქალაქო მოძრაობა სამართლიანობის აღდგენის მოთხოვნით. ერთ-ერთი ეტაპი უზენაეს სასამართლოსთან დიდი აქცია იქნება, რადგან ჩემი ღრმა რწმენით, კოტე კუბლაშვილი არის ბოროტების სათავე საქართველოში.მან შექმნა სისტემა, სადაც არანაირი სამართალი არ არსებობს, რომელიც პოლიტიკურ შეკვეთებზე იყო აწყობილი და ის უნდა დაისაჯოს ისევე, როგორც დაისჯება მერაბიშვილი, სააკაშვილი, ადეიშვილი და ყველა ის ადამიანი, ვინც ამ ბოროტებას ჩაუყარა საფუძველი“, - განაცხადა საინიციატივო ჯგუფის წევრმა გოგა ხაინდრავამ.
ახალციხის რაიონულ სასამართლოსთან გამართულ აქციაში, რეგიონის სხვადასხვა მუნიციპალიტეტებიდან ჩამოსულ მოქალაქეებთან ერთად, არასამთავრობო ორგანიზაციების წარმომადგენლები და უფლებადამცველებიც მონაწილეობდნენ.
„სახალხო კრება“ ყოველთვის იქაა, სადაც უსამართლობის წინააღმდეგ იბძვიან. ამ უზნეობას, რაც ერთი კვირის წინ ახალციხეში მოხდა, ისე არ დავტოვებთ, ბოლომდე ვიბრძოლებთ. ამ ყველაფერს ბოლო მოეღება ოქტომბერში, როცა კოჰაბიტაციური რეჟიმი დასრულდება და ქართველი ერი სწორ არჩევანს გააკეთებს. მივაღწევთ იმას, რომ საქართველო ყველა დამნაშავისაგან გათავისუფლდეს“, - განაცხადა „სახალხო კრების“ წევრმა გია ბურჯანაძემ.
საინიციატივო ჯგუფის წევრს ირმა ინაშვილს იმედი აქვს, რომ საპროტესტო აქციები და სამოქალაქო მოძრაობა გარკვეულ შედეგს გამოიღებს.
„ჩვენ არ შევეგუებით იმას, რომ თუ ადამიანი მწამებელია, სასამართლომ ასე უცერემონიოდ გაათავისუფლოს. წამება არის ყველაზე მაღალი კატეგორიის დანაშაული, ამიტომ ამ გამოძიების პროცესში ჩვენ ჩავრთეთ უფლებადამცველი ორგანიზაცია, ჟურნალისტები, ჩვენ ვხვდებით საელჩოებს, შევხვდით სახალხო დამცველს, რომელმაც აღგვითქვა, რომ შეისწავლის ამ საქმეს“, - განაცხადა ირმა ინაშვილმა.
აქციის მონაწილეები ამბობენ, რომ გაჩერებას არ აპირებენ და ყველაფერს იღონებენ იმისთვის, რომ დამნაშავეები დაისაჯონ.
„კუბლაშვილის სისტემამ გამოუშვა ის ჯალათები, რომლებიც ამ წლების განმავლობაში ხალხს აწამებდნენ, დასდევდნენ, შეურაცხყოფას აყენებდნენ. ეს იყო ბოლო წვეთი. ჩვენ ყველაფერს გავაკეთებთ იმისთვის, რომ ეს ჯალათი მოსამართლეები და პოლიციელები მოხვდნენ იმ დამნაშავე ხალხის სკამზე, სადაც ჩვენ უსამართლოდ დაგვსვეს“, - ამბობს დემოკრატიული მოძრაობის წევრი, ყოფილი პოლიტპატიმარი გივი გაჩეჩილაძე.
„ჩვენ გვინდა ისეთი მოსამართლე და ნებისმიერ თანამდებობაზე ისეთი პირი, რომელიც სამართლიანი იქნება და სამართლიანობას აღადგენს“, - აცხადებს აქციის ერთ-ერთი მონაწილე ლელა ჩიტორელიძე.
საინიციატივო ჯგუფის წევრების თქმით, მომდევნო ეტაპზე ისინი იმ დაწესებულების ხელმძღვანელებს შეხვდებიან, ვისაც აღნიშნული საქმის მოკვლევა ევალება.
„ჩვენ შევხდებით კბილაშვილს, ღარიბაშვილს, იუსტიციის მინისტრს, ადამიანის უფლებათა დაცვის კომიტეტის თავმჯდომარეს ეკა ბესელიას, ახალგაზრდა იურისტთა ასოციაციას და ყველა იმ არასამთავრობო ორგანიზაციებსა და დაწესებულებებს, რომლებსაც აქვთ იმის კომპეტენცია, რომ ამ საქმის ანალიზი გააკეთონ. ჩვენი მიზანია გავარკვიოთ ადგილი ჰქონდა წამება თუ ცილისწამებას“, - ამბობს გოგა ხაინდრავა.
ამავე თემაზე იხილეთ
ფოტორეპორტაჟი.
[თამარ თოთაძე, ახალციხე]