შეეწირა თუ არა ხვედელიანის საქმეს პროკურორი

მირიან ჭუმბურიძე თბილისის სააპელაციო სასამართლოში, 17 დეკემბერს, ხვედელიანის საქმის განაჩენის გამოცხადებას აღარ ესწრებოდა. ბოლო სასამართლო პროცესზე ბრალდების მხარეს სამცხე-ჯავახეთის საოლქო პროკურატურის პროკურორი მამუკა ქომოშვილი წარმოადგენდა.

მირიან ჭუმბურიძე იყო მამუკა ხვედელიანისა და მასთან ერთად ყოფილი ბრალდებულების პროკურორი, როგორც ახალციხის რაიონულ, ასევე თბილისის სააპელაციო სასამართლოშიც. ორივე ინსტანციის სასამართლოში სასამართლომ გამამართლებელი განაჩენი გამოიტანა. გავრცელებული ინფორმაციით მირიან ჭუმბურიძის თანამდებობა სწორედ ხვედელიანის საქმეს შეეწირა.

თავად ჭუმბურიძე ამ ფაქტს უარყოფს და ამბობს, რომ პროკურატურა პირადი განცხადების საფუძველზე დატოვა, თუმცა მიზეზს, თუ რატომ წამოვიდა სამსახურიდან არ ასახელებს: “სხვაგან გადავედი სამუშაოდ, მაგრამ სად ამას ვერ გეტყვით“.

ჭუმბურიძის პროკურატურიდან გათავისუფლებას ხვედელიანის წაგებული საქმის გამო გამორიცხავს მთავარი პროკურატურის საზოგადოებასთან ურთიერთობის დეპარტამენტის უფროსი თემო დოლიძეც: „ეს არის ჩვეულებრივი საკადრო ცვლილება“.

შეგახსენებთ, ახალციხის რაიონულმა სასამართლომ, ბორჯომის პოლიციის ყოფილი უფროსი, "ერთიანი ნაციონალური მოძრაობის" მაჟორიტარი დეპუტატობის კანდიდატი, მამუკა ხვედელიანი უდანაშაულოდ სცნო და სასამართლო დარბაზიდან გაათავისუფლა. სასამართლოს განაჩენს ახალციხესა და ბორჯომში საპროტესტო აქციების ტალღა მოჰყვა. აქციის მონაწილეები ხვედელიანის გათავისუფლებას აპროტესტებდნენ. მათ ახალციხის სასამართლოს შენობას ცოცხები და კვერცხებიც დაუშინეს.

[თამუნა უჩიძე, ახალციხე]