სამცხე-ჯავახეთის სოფლებში სომხური მხარის დასახმარებლად თანხა და პროდუქტი ისევ გროვდება

27 სექტემბრიდან, მას შემდეგ, რაც ყარაბაღში საომარი მოქმედებები განახლდა, ახალციხის, ახალქალაქისა და ნინოწმინდის მუნიციპალიტეტებში თანხას ყოველდღიურად აგროვებენ. საქართველოში მცხოვრები სომხების ფონდში „Foundation of Georgian Armenians, რომელიც 29 სექტემბერს შეიქმნა, პირველივე დღეს 13 505 ლარი და 400 დოლარი გადაირიცხა. თანხა ძირითადად ახალქალაქის სოფლებიდან შეგროვდა და ერთ ანგარიშზე ჩაირიცხა. დღეს, 1-ელ ოქტომბერს დამატებით 5 340 ლარი შეგროვდა.

„ეს თანხა გადაირიცხა საჭირო სამედიცინო აღჭურვილობის შესაძენად. აღჭურვილობა არცახში (ყარაბაღი) ხვალ ჩავა“, - წერია ფონდის გვერდზე.

ახალციხის ხუთ სოფელში აბათხევში, წინუბანში, ნაოხრებში, ჯულღასა და წყალთბილაში სომხური მხარის დასახმარებლად 18 000 ლარი და საკვები პროდუქტები შეაგროვეს. მათ შორის, კონსერვები, ტომრებით კარტოფილი, ხახვი, კომბოსტო, გოგრა, ვაშლი და სხვა სოფლის მეურნეობის პროდუქტი. ასევე ტკბილეული, ტანსაცმელი და ფეხსაცმელი.

„ჯერ მანქანით პროდუქტს გავაგზავნით და შემდეგ ფულსაც. ახლა მანქანის საქმეს ვაგვარებთ, შემდეგ დავტვირთავთ“, - ამბობს ერთ-ერთი ადგილობრივი „სამხრეთის კარიბჭესთან“.

თანხა შეგროვდა ასპინძის სოფელ დამალაშიც: „მეორე დღეა ვაგრძელებთ ფულის შეგროვებას. გუშინ მარტო დამალაში 7 000 ლარი შეგროვდა“, - აცხადებენ ადგილობრივები.

ცნობისთვის, სამცხე-ჯავახეთში მცხოვრებმა ეთნიკურად სომეხმა მოსახლეობამ 29 სექტემბერს, გვიან ღამით ორი სატვირთო მანქანით სურსათი გაუგზავნეს სომხურ მხარეს.

იმავე დღეს, დახმარებისთვის მზადება დაიწყეს ახალციხის მუნიციპალიტეტის სოფლებში.

ამავე თემაზე ნახეთ:

‘სახელმწიფოსგან სერიოზული მიდგომაა საჭირო’ - ექსპერტები ყარაბაღში ჰუმანიტარული ტვირთის გაგზავნაზე


ახალციხე


ახალციხის სოფლები


ახალქალაქი

[თაკო ფეიქრიშვილი]