სურსათით დატვირთულ მანქანებს საზღვრის გადაკვეთის უფლება მისცეს [ვიდეო]

სომხეთის საზღვართან ჩაკეტილი გზა გაიხსნა, ამ ეტაპზე გადაადგილება თავისუფალია. მიმდებარე ტერიტორიაზე მობილიზებულია საპატრულო პოლიციის რამდენიმე ეკიპაჟი.

როგორც ადგილობრივები "სამხრეთის კარიბჭესთან" აცხადებენ, მიაღწიეს შეთანხმებას, რომ სურსათით დატვირთული მანქანები სომხეთში გაამგზავრონ, რაც შეეხება საბურავებს, ეს ჯერ გადაწყვეტილი არ არის.

"ოთხი ტრაილერი გვყავდა საბურავებით დატვირთული და უკან გააბრუნეს, ხვალიდან დავიწყებთ მოლაპარაკებებს, რომ სურსათის მსგავსად მათი გატანის უფლება მოგვცენ", – აცხადებენ ადგილობრივები.

ადგილობრივებთან ერთად, სამართალდამცავებთან მოლაპარაკებებს აწარმოებდა დილისკის ეკლესიის მღვდელი ტერ ტიგრან მხითარიანი. მისი თქმით, რადგან სურსათის გადატანის უფლება მისცეს, ადგილობრივები ხვალ კიდევ შეაგროვებენ.

დღეს, 28 სექტემბერს ახალქალაქსა და ნინოწმინდაში მთელი დღის განმავლობაში აგროვებდნენ სურსათს, ტანსაცმელს, მედიკამენტებს და საბურავებს. სომხეთის დასახმარებლად ახალგაზრდები მოხალისეთა სიაშიც ჩაეწერნენ.

ყარაბაღსა და აზერბაიჯან-სომხეთის საზღვარზე, საბრძოლო მოქმედებები 27 სექტემბერს დაიწყო. შეტაკებების პირველ დღეს ორივე მხარემ გამოიყენა ვერტმფრენები, საფრენი აპარატები, ტანკები და არტილერია. აზერბაიჯანის მხარეს დაღუპულია ექვსი ადამიანი, დაჭრილია 19. რაც შეეხება მთიან ყარაბაღს, ორდღიანი დაპირისპირების შედეგად გარდაცვლილია 32 მებრძოლი. სომხეთში კი 59.

ყარაბაღის სადავო ტერიტორიაზე აზერბაიჯანი და სომხეთი ერთმანეთს მიმდინარე წლის ივლისშიც დაუპირისპირდნენ. შეტაკებებს 16 ადამიანი ემსხვერპლა.

სომხეთსა და აზერბაიჯანს შორის კონფლიქტი მე-20 საუკუნის დასაწყისში დაიწყო, ამ დროს ეთნიკურად სომხებით დასახლებული ტერიტორია იოსებ სტალინმა საბჭოთა აზერბაიჯანში ავტონომიურ ოლქად გადააკეთა. ორ ქვეყანას შორის კონფლიქტი საბჭოთა კავშირის დაშლის შემდეგ, 1991 წელს განახლდა.





[თაკო ფეიქრიშვილი, რიმა სარუხანიან]