სომხურ თემს ახალციხიდან ყარაბაღში ჰუმანიტარული ტვირთის გაგზავნა სურს

„ახლა გადავწყვიტეთ, რომ ბოსტნეული, კარტოფილი და მსგავსი რაღაცები შევაგროვოთ და გავაგზავნოთ. გვინდა რომ მივიდეს ყარაბაღის მოსახლეობასთან, რომელიც ახლა იბომბება აზერბაიჯანის მხრიდან. ახლა იქ ჰუმანიტარული კატასტროფაა, ძალიან საშიში მდგომარეობაა და ომის დროს სჭირდებათ კვება“, - ამბობს ერთ-ერთი მონაწილე ედუარდ აივაზიანი.

მისივე თქმით, ამ ეტაპზე სხვა სახის დახმარება არ იგეგმება.

„ჯერ საკვებზეა საუბარი, მერე ვნახავთ. მედიკამენტებიც სჭირდებათ, მაგრამ საბაჟოზე შეიძლება პრობლემები იყოს. შემდეგ ფულსაც შევაგროვებთ და ბურღულეულს ან მსგავს პროდუქტსაც გავგზავნით“.

ამავე თემაზე სასაუბროდ, ახალციხეში მცხოვრები სომხური მოსახლეობა დღეს, 29 სექტემბერს კიდევ ერთხელ სომხურ ეკლესიაში შეიკრიბება.

ცნობისთვის, გუშინ 29 სექტემბერს გვიან ღამით, სურსათით დატვირთული ორი მიკროავტობუსი გადავიდა საქართველო-სომხეთის საზღვარზე. სურსათი ჯავახეთში მცხოვრებმა სომხურმა თემმა შეაგროვა. მათ ასევე საზღვარზე მანქანის საბურავებით დატვირთული ტრაილერების გაყვანა სურდათ, თუმცა ამისი უფლება არ მისცეს.

[მარიამ ბარძიმაძე]