ყარაბაღის კონფლიქტში დაზარალებულთა დასახმარებლად ახალციხეში ფულს შეაგროვებენ

ახალქალაქის და ნინოწმინდის შემდეგ, ყარაბაღის კონფლიქტში დაზარალებულთა დასახმარებლად, ახალციხეში მცხოვრები ეთნიკურად სომეხი მოსახლეობა ემზადება, ისინი დღეს, 29 სექტემბერს რაბათში მდებარე სომხურ ეკლესიაში შეიკრიბნენ. მოლაპარაკებების შედეგად გადაწყდა, რომ სურსათის ნაცვლად ფული შეგროვდება.

სასულიერო პირის, თორგომ ვარდანიანის განცხადებით, თანხის შესაგროვებლად შეირჩევა 2–3 ახალგაზრდა და ისინი კარდაკარ დაივლიან.

„ჩვენ ყველას, სომხეთის გარეთ მცხოვრები სომხები ვაკეთებთ იმას, რაც ამ ეტაპზე შეგვიძლია. მთიან ყარაბაღს ამჯერად ფინანსურად დავეხმარებით, რადგან როგორც გავარკვიეთ მათ აქვთ სურსათი, ტანსაცმელი და მედიკამენტი. ხვალ 18:00 საათზე შეგროვებულ თანხას შევაჯამებთ სამოციქულო ეკლესიაში და თანხას გადავრიცავთ სომხეთის თავდაცვის სამინისტროს ანგარიშზე“, – აცხადებს სასულიერო პირი.

ცნობისთვის, გუშინ 29 სექტემბერს ჯავახეთში მცხოვრებმა ეთნიკური უმცირესობის წარმომადგენლებმა სომხეთში გასაგზავნად სურსათი, მედიკამენტები და საბურავები შეაგროვეს, რამდენიმე საათიანი მოლაპარაკებების შედეგად პოლიციის თანმაშრომლებმა საზღვარზე მხოლოდ სურსათით და მედიკამენტებით დატვირთული მიკროავტობუსები გაატარეს. საბურავებით სავსე მანქანები კი უკან დააბრუნეს.

მთიანი ყარაბაღის გამო, სომხეთსა და აზერბაიჯანს შორის სამხედრო დაპირისპირება 27 სექტემბერს განახლდა. ორივე ქვეყანაში საომარი მდგომარეობაა გამოცხადებული, არის მსხვერპლიც.


ყარაბაღის სადავო ტერიტორიაზე აზერბაიჯანი და სომხეთი ერთმანეთს მიმდინარე წლის ივლისშიც დაუპირისპირდნენ. შეტაკებებს 16 ადამიანი ემსხვერპლა.

სომხეთსა და აზერბაიჯანს შორის კონფლიქტი მე-20 საუკუნის დასაწყისში დაიწყო, ამ დროს ეთნიკურად სომხებით დასახლებული ტერიტორია იოსებ სტალინმა საბჭოთა აზერბაიჯანში ავტონომიურ ოლქად გადააკეთა. ორ ქვეყანას შორის კონფლიქტი საბჭოთა კავშირის დაშლის შემდეგ, 1991 წელს განახლდა.

[რიმა სარუხანიან]