ბორჯომში მეოთხეკლასელებმა თბილისის დასახმარებლად 300 ლარი შეაგროვეს

დღეს, 17 ივნისს, ბორჯომის №1 საჯარო სკოლის მოსწავლეებმა მე-4 კლასის დამთავრებასთან დაკავშირებით ღონისძიება გამართეს. მოსწავლეებმა სცენაზე ქართული ხალხური ზღაპარის „რწყილი და ჭიანჭველას“ მიხედვით დადგმული მუსიკალური სპექტაკლი წარმოადგინეს.

სპექტაკლის დაწყებამდე მონაწილეებმა განმარტეს, რომ თბილისში მომხდარი სტიქიის გამო, საღამომ საქველმოქმედო ხასიათი მიიღო. დარბაზში დადგმული იყო ყუთი შემოწირულობისთვის.

სპექტაკლის დასრულების შემდეგ, კლასის დამრიგებელმა მერი ხარატიშვილმა განმარტა, რომ შეწირულობებით 300 ლარი შეგროვდა, რაც მთლიანად გადაირიცხება დაზარალებულთა დახმარების ფონდში.

ღონისძიებას ბორჯომის მუნიციპალიტეტის გამგებლის მოადგილე ანზორ სვანიძე, კულტურის სამსახურის უფროსი მარინა ხუჯაძე და ადგილობრივი ხელისუფლების სხვა წარმომადგენლებიც ესწრებოდნენ.



[ნინო ნარიმანიშვილი, ბორჯომი]