32 წლის ახალგაზრდის დასახმარებლად საჭირო თანხა შეგროვდა

სოფელ გურკელში მცხოვრებ რუსლან ჩუტკერაშვილს, რომელსაც უბედური შემთხვევის შედეგად ჯანმრთელობის პრობლემები აქვს და ეტლით გადაადგილდება, ოპერაცია ესაჭიროება (აუტოლოგიური ღეროვანი უჯრედების აღება ტრანსპლანტაციისათვის).

იმისათვის რომ რუსლანმა დამოუკიდებლად შეძლოს გადაადგილება „ძვლის ტვინის ღეროვანი უჯრედების გადანერგვა“ სჭირდება. ოპერაცია 6000 ლარი ჯდება. ოჯახს კი საჭირო სახსრები არ აქვს.

ოჯახმა დასახმარებლად გამგეობას მიმართა და ბიუჯეტიდან მას 2000 ლარი გამოუყეს. 2000 ლარს რიცხავს საქართველოს ჯანდაცვის სამინისტრო.

ახალციხის გამგეობისა და საკრებულოს თანამშრომლებმა, რუსლანის დასამარებლად, ხელფასებიდან გარკვეული თანხა შეაგროვეს და შეკრებილი 1700 ლარი ოჯახს უკვე მიაწოდეს.

ოპერაციისთვის დარჩენილი თანხა კი სოფელში, კარდაკარ სიარულით, იმავე სოფლის სკოლის სამოქალაქო კლუბის „იმედის“ წევრებმა შეკრიბეს.

ოჯახს ოპერაციისთვის საჭირო თანხა უკვე შეუგროვდა. რუსლანი ამბობს, რომ ექიმის პასუხს ელოდება და სავარაუდოდ მომავალ კვირაში სამედიცინო პროცედურებს დაიწყებს.
რუსლან ჩუტკერაშვილს უბედური შემთხვევა 9 წლის წინ შეემთხვა. თბილისში, ოჯახის დასახმარებლად წასული, 2007 წლის 11 ოქტომბერს მშენებარე ბინის მეხუთე სართულიდან გადმოვარდა და ხერხემალი დაუზიანდა. მას შემდეგ დამოუკიდებლად გადაადგილება აღარ შეუძლია.

ოპერაციის შემდეგ 32 წლის ახალგაზრდას რეაბილიტაციის კურსი დასჭირდება. ექიმების თქიმით, ნელ–ნელა იგი ფეხზე დადგომას შეძლებს.

[sknews.ge]